बलात्कार-हत्या प्रकरणातील आरोपी चकमकीत मरण पावला

गुन्हेदृश्याची पुनर्रचना करताना पोलिसांची रिव्हॉल्व्हर हिसकावून गोळीबार; पाच महिन्यांत बलात्काराचे 2,454 गुन्हे नोंदविल्याचा दावा

वृत्तसंस्था, कोलकाता

पश्चिम बंगालमधील उत्तर 24 परगणा जिह्यातील गायघाटा येथे 17 वषीय विद्यार्थिनीवरील बलात्कार आणि हत्या प्रकरणातील 23 वषीय आरोपीचा पोलिसांच्या गोळीबारात मृत्यू झाला. सोमवारी रात्री गुन्ह्याच्या घटनास्थळाची पुनर्रचना सुरू असताना आरोपीने पोलिस कर्मचाऱ्याची सर्व्हिस रिव्हॉल्व्हर हिसकावून गोळीबार केल्याचा पोलिसांचा दावा आहे. यानंतर पोलिसांनी केलेल्या प्रत्युत्तरादाखल गोळीबारात आरोपी जखमी झाला. त्याला चांदपाडा ग्रामीण ऊग्णालयात नेण्यात आले; मात्र डॉक्टरांनी त्याला मृत घोषित केले. त्याचा मृतदेह शवविच्छेदनासाठी पाठविण्यात आला आहे.

पोलिसांच्या माहितीनुसार, आरोपीने रिव्हॉल्व्हर कशी हिसकावली आणि त्यानंतर गोळीबारापर्यंत परिस्थिती कशी पोहोचली, याची चौकशी केली जाऊ शकते. गोळीबार सुरू असताना पोलिस कर्मचाऱ्यांनी जवळच्या कालव्यात लपून स्वत:चा बचाव केला. या घटनेत कोणताही पोलिस कर्मचारी जखमी झाला नसल्याचे सांगण्यात आले. दरम्यान, आरोपीचे नातेवाईक ऊग्णालयात पोहोचले आणि त्यांनी या घटनेबद्दल नाराजी व्यक्त केली. परिसरात मोठ्या प्रमाणावर पोलिस बंदोबस्त तैनात करण्यात आला आहे.

संगीत कार्यक्रमाला गेलेली विद्यार्थिनी दुसऱ्या दिवशी मृतावस्थेत

पोलिसांच्या माहितीनुसार, अकरावीत शिकणारी विद्यार्थिनी आपल्या आजी-आजोबांसोबत राहत होती. शनिवारी रात्री ती घराजवळ आयोजित संगीत कार्यक्रमाला गेली होती. पोलिस सूत्रांच्या माहितीनुसार, रात्री सुमारे 10.30 वाजता फोन आल्यानंतर ती कार्यक्रमातून निघाली; मात्र घरी परतली नाही. रविवारी सकाळी गायघाटा परिसरात शेजाऱ्याच्या घराबाहेर तिचा मृतदेह आढळला.  घटनेची माहिती मिळताच पोलिसांनी तपास सुरू करून संशयित तऊणाला अटक केली. विद्यार्थिनीच्या मृतदेहावरील प्राथमिक तपासणीत डोके, चेहरा आणि शरीराच्या इतर भागांवर जखमांच्या खुणा आढळल्याचे सांगण्यात आले. मृतदेह शवविच्छेदनासाठी पाठविण्यात आला असून, या प्रकरणाचा पुढील तपास सुरू आहे.

तीन महिन्यांत दुसरी अशी घटना

गुन्ह्याच्या घटनास्थळाची पुनर्रचना सुरू असताना आरोपीने पोलिसांची रिव्हॉल्व्हर हिसकावून गोळीबार केल्याची ही तीन महिन्यांतील दुसरी घटना असल्याचे वृत्तात म्हटले आहे. जुलैमध्ये दक्षिण 24 परगणा जिह्यातील बाऊईपूर येथे 11 वषीय मुलीवरील बलात्कार आणि हत्या प्रकरणातील मुख्य आरोपीचाही पोलिसांच्या गोळीबारात मृत्यू झाला होता. त्या प्रकरणातही घटनास्थळाची पुनर्रचना करताना आरोपीने पोलिस अधिकाऱ्याची रिव्हॉल्व्हर हिसकावून गोळीबार केल्याचा पोलिसांचा दावा होता. त्यानंतर पोलिसांनी केलेल्या प्रत्युत्तरादाखल गोळीबारात तो जखमी झाला आणि त्याचा मृत्यू झाला.

पाच महिन्यांत बलात्काराचे 2,454 गुन्हे नोंदविल्याचा दावा

पश्चिम बंगालमधील गुन्हेगारीविषयक आकडेवारीनुसार, 1 मे ते 24 सप्टेंबर या कालावधीत राज्यात बलात्काराचे 2,454 गुन्हे नोंदविण्यात आल्याचे वृत्त आहे. या आकडेवारीनुसार, पाच महिन्यांच्या कालावधीत दररोज सरासरी सुमारे 17 बलात्काराचे गुन्हे नोंदविण्यात आले. याच कालावधीत राज्यात खुनाचे 600, खुनाचा प्रयत्न केल्याचे 13,114 आणि गंभीर दुखापत केल्याचे 32,341 गुन्हे नोंदविण्यात आल्याचे सांगण्यात आले आहे.