छोट्या पडद्यावर एसीपी प्रद्युम्न पुन्हा अवतरणार, सीआयडीचा पुढील भाग लवकरच.. ‘दया’ ने दिली माहिती

छोट्या पडद्यावरील सर्वाधिक लोकप्रिय मालिका ‘CID’च्या तिसऱ्या पर्वाची चाहते आतुरतेने वाट पाहत आहेत. या चर्चेदरम्यान ‘दया’ ही भूमिका साकारणारे अभिनेते दयानंद शेट्टी यांनी मालिकेच्या पुनरागमनाबाबत वाच्यता केली आहे. त्यांनी सांगितले की, सध्या CID 3 संदर्भात चर्चा सुरू असून, येत्या एक-दोन महिन्यांत स्वतंत्र पातळीवर काहीतरी नवीन करण्याचा प्रयत्न केला जाऊ शकतो.

‘चेंज अँड बियॉन्ड’ या पॉडकास्टमध्ये बोलताना दयानंद शेट्टी म्हणाले की, CID च्या दुसऱ्या सीझनचा शेवटचा भाग डिसेंबर 2025 मध्ये प्रसारित झाला. त्यानंतर दुसऱ्या सीझनला प्रेक्षकांचा उत्तम प्रतिसाद मिळाल्यामुळे तिसरा सीझन येईल, अशी अपेक्षा होती. दयानंद शेट्टी म्हणाले, “सध्या चॅनेलला कदाचित या प्रकल्पात रस नसावा. पण आजही आम्ही जिथे जातो, तिथे चाहत्यांचा पहिला प्रश्न असतो, ‘सर, CID कधी परत येणार?’ दोन दशकांहून अधिक काळानंतरही लोक या मालिकेवर तितकेच प्रेम करतात, ही आमच्यासाठी मोठी गोष्ट आहे.”

ते पुढे म्हणाले की, “आम्ही लहानपणी या मालिकेत काम करण्यास सुरुवात केली होती. आता आम्ही मोठे झालो आहोत, पण प्रेक्षकांची भावना आजही तशीच आहे. त्यामुळे आम्ही वैयक्तिक पातळीवर काहीतरी नवीन करण्याचा विचार करत आहोत. हे सोनीसाठी नसेल, पण एक-दोन महिन्यांत काहीतरी करण्याचा प्रयत्न सुरू आहे.”

संवादादरम्यान दयानंद शेट्टी यांनी जाहिरातींबाबतचा आपला ठाम दृष्टिकोनही मांडला. त्यांनी सांगितले की, लोकप्रियता असूनही त्यांनी पैशासाठी कधीही चाहत्यांची दिशाभूल करणाऱ्या जाहिराती केल्या नाहीत. ते म्हणाले, “मी शीतपेये, तंबाखू किंवा मद्याच्या जाहिराती करत नाही. आरोग्यदायी पेये, सप्लिमेंट्स आणि आयुर्वेदिक उत्पादनांच्या अनेक कोट्यवधी रुपयांच्या जाहिरातींच्या ऑफर येतात. पण मी संबंधित कंपन्यांना विचारतो की, त्यांच्या उत्पादनाची शंभर टक्के हमी देऊ शकता का? त्यांच्याकडे उत्तर नसते. त्यामुळे मी अशा जाहिराती स्वीकारत नाही.”

CID ही मालिका गेल्या दोन दशकांहून अधिक काळापासून प्रेक्षकांची आवडती ठरली आहे. एसीपी प्रद्युम्न, दया आणि अभिजीत या पात्रांनी घराघरात वेगळी ओळख निर्माण केली. त्यामुळे CID 3 कधी येणार, याकडे आजही चाहत्यांचे लक्ष लागून आहे. दयानंद शेट्टी यांच्या वक्तव्यामुळे मालिकेच्या पुनरागमनाच्या चर्चांना पुन्हा एकदा वेग आला आहे.