ॲडोबीने अनिल चक्रवर्ती यांची नवे अध्यक्ष आणि मुख्य कार्यकारी अधिकारी (सीईओ) म्हणून निवड केली आहे. गेल्या १८ वर्षांहून अधिक काळ कंपनीचे नेतृत्व करणाऱ्या शंतनू नारायण यांची जागा आता अनिल चक्रवर्ती सांभाळणार आहेत.
अमेरिकन बहुराष्ट्रीय सॉफ्टवेअर कंपनीने गुरुवारी केलेल्या एका घोषणेमध्ये स्पष्ट केले की चक्रवर्ती १ डिसेंबर रोजी आपली नवीन जबाबदारी स्वीकारतील आणि नारायण हे कार्यकारी अध्यक्ष (एक्झिक्युटिव्ह चेअर) ही भूमिका सांभाळतील.
बनारस हिंदू विद्यापीठाचे माजी विद्यार्थी असलेले चक्रवर्ती हे सध्या ॲडोबीच्या कस्टमर एक्सपिरियन्स ऑर्केस्ट्रेशन बिझनेस आणि इंटरनॅशनल फील्ड ऑपरेशन्सचे अध्यक्ष आहेत.
‘एआयच्या या युगात ॲडोबीच्या विकासाचे नेतृत्व करण्यासाठी अनिल हीच योग्य व्यक्ती आहे याबद्दल माझी पूर्ण खात्री आहे, आणि माझ्या कार्यकारी अध्यक्ष या नव्या भूमिकेत त्यांच्यासोबत जवळून काम करण्यासाठी मी उत्सुक आहे’, असे नारायण यांनी एका निवेदनात म्हटले आहे.
ॲडोबीच्या क्रिएटिव्हिटी आणि प्रॉडक्टिव्हिटी व्यवसायाचे अध्यक्ष तसेच या सर्वोच्च पदाच्या शर्यतीत असलेले डेव्हिड वाधवानी यांनी पाच वर्षांच्या कार्यकाळानंतर कंपनी सोडत असल्याची घोषणा केली.
‘ॲडोबी माझ्यासाठी जितकी महत्त्वाची आहे, तितकाच मी विचार केला की माझ्यासाठी एका नवीन प्रवासाची सुरुवात करण्याची हीच योग्य वेळ आहे; आणि अनिल हे सीईओ पदाची धुरा सांभाळत असताना ॲडोबीसाठीही पुढे जाण्याची ही उत्तम संधी आहे’, असे वाधवानी यांनी लिंक्डइनवरील एका पोस्टमध्ये म्हटले आहे.
कंपनीचा डिजिटल एक्सपिरियन्स व्यवसाय सांभाळणारे कार्यकारी उपाध्यक्ष आणि महाव्यवस्थापक म्हणून चक्रवर्ती जानेवारी २०२० मध्ये ॲडोबीमध्ये रुजू झाले होते.
सप्टेंबर २०२० मध्ये, त्यांनी क्रिएटिव्हिटी आणि प्रॉडक्टिव्हिटीसह ॲडोबीच्या सर्व उत्पादनांशी संबंधित कॉर्पोरेट ग्राहकांची सेवा करत कंपनीच्या जगभरातील फील्ड ऑपरेशन्सचे नेतृत्व करण्याची अतिरिक्त जबाबदारी स्वीकारली.
डिसेंबर २०२१ मध्ये, त्यांना डिजिटल एक्सपिरियन्स आणि जगभरातील फील्ड ऑपरेशन्सचे अध्यक्ष म्हणून पदोन्नती देण्यात आली.
‘ॲडोबीमध्ये पुढे जे काही घडणार आहे त्यासाठी हा सन्मान मिळणे आणि कमालीचा उत्साह असणे स्वाभाविक आहे. आमचे ग्राहक, कर्मचारी आणि एआयमधील नवनिर्मिती या गोष्टी नेहमीप्रमाणेच आमच्या प्राधान्यावर राहतील. आमचे अध्यक्ष आणि सीईओ शंतनू नारायण तसेच माझ्यावर विश्वास दाखवल्याबद्दल ॲडोबी संचालक मंडळाचे मनापासून आभार. ॲडोबीचे सर्वोत्तम दिवस अजून पुढे यायचे आहेत’, असे चक्रवर्ती यांनी लिंक्डइनवरील एका पोस्टमध्ये म्हटले आहे.
Comments are closed.