‘आता इतरांनाही संधी मिळेल का’? अश्विनच्या निवृत्तीनंतर आकाश चोप्रांकडून मोठा प्रश्न उपस्थित!

महान स्पिनर रविचंद्रन अश्विनने (Ravichandran Ashwin) आयपीएलमधून निवृत्तीची घोषणा केल्याला फक्त एक दिवस झाला आहे आणि त्याच्या या निर्णयामुळे भारतीय क्रिकेटमध्ये एक वेगळीच चर्चा पसरली आहे. हे स्पष्ट झाले आहे की, अश्विनच्या या निर्णयामागचं कारण म्हणजे परदेशी लीगमध्ये खेळण्याची इच्छा. तो इंग्लंडमध्ये ‘द हंड्रेड’ या फॉरमॅटमध्ये खेळणारा पहिला भारतीय क्रिकेटपटू ठरू शकतो. याच मुद्द्यावर आकाश चोप्राने (Aakash chopra) प्रश्न उपस्थित केला आहे. त्यांनी विचारलं , आता इतर भारतीय क्रिकेटपटूंनाही परदेशी टी20 लीग खेळण्याची संधी मिळेल का?

आकाश यांनी आपल्या युट्यूब चॅनलवर सांगितलं, रविचंद्रन अश्विनने आयपीएल निवृत्तीनंतर जाहीर केलं की तो जगभरातील वेगवेगळ्या लीगमध्ये खेळणार आहे. तो एक नवा मार्ग दाखवत आहे. त्याच्या या पावलामुळे इतर भारतीय खेळाडूंनाही परदेशी लीग खेळण्याचा मार्ग मोकळा होईल का?” त्यांनी पुढे सांगितलं, अश्विनचं आयपीएल करिअर अतिशय शानदार राहिलं आहे आणि तो ज्या कोणत्या लीगमध्ये खेळायचं ठरवेल, तिथे त्याला सहज निवडलं जाईल आणि तो उत्कृष्ट कामगिरी करेल.

माजी क्रिकेटपटू म्हणाले, आयपीएलचं आकर्षण आणि नावीन्य टिकवण्यासाठी बीसीसीआयने हा नियम केला आहे की, भारतीय खेळाडूंना आंतरराष्ट्रीय क्रिकेट आणि आयपीएलमधून निवृत्ती घ्यावी लागते. अश्विनच्या या निर्णयानंतर याचा भारतीय क्रिकेटवर नेमका काय परिणाम होतो हे पाहणं खूप रंजक असेल. मात्र या निर्णयामुळे अनेक ज्येष्ठ खेळाडूंच्या डोळ्यांत नव स्वप्न नक्कीच फुललं आहे. जे खेळाडू घरगुती क्रिकेटमध्ये उत्कृष्ट खेळ करूनही टीम इंडियाच्या निवडीपासून दूर राहतात आणि आयपीएलच्या कोणत्याही फ्रँचायझीकडून संधी मिळत नाही, त्यांच्यासाठी हे पाऊल आशेचं कारण ठरू शकतं.

अश्विनच्या आयपीएल निवृत्तीनंतर लगेचच चर्चा रंगली की तो पुढच्या वर्षी ‘द हंड्रेड’मध्ये खेळताना दिसेल. यापूर्वी अंबाती रायडूने सीपीएल आणि दिनेश कार्तिकने साउथ आफ्रिका टी20 लीगमध्ये खेळ केला आहे. आयपीएलमध्ये 2008 ते 2025 दरम्यान अश्विनने चेन्नई सुपर किंग्ज, रायझिंग पुणे सुपरजायंट्स, पंजाब किंग्ज, दिल्ली कॅपिटल्स आणि राजस्थान रॉयल्स या संघांसाठी खेळलं आहे. पंजाब किंग्जचा तो कॅप्टनही राहिला आहे. आयपीएलमधील 220 सामन्यांच्या 98 डावांमध्ये त्याने 833 धावा केल्या आहेत आणि 187 विकेट्स घेतल्या आहेत. आयपीएल इतिहासातील तो पाचवा सर्वाधिक यशस्वी गोलंदाज ठरला आहे.