कोलकाता नाईट रायडर्स (KKR) संघाने इंडियन प्रीमियर लीग (IPL) 2025 हंगामासाठी अनुभवी फलंदाज अजिंक्य रहाणेची कर्णधार म्हणून निवड केली आहे. श्रेयस अय्यरच्या अनुपस्थितीत हा निर्णय घेण्यात आला असून, केकेआर आता आपल्या जेतेपदाचे संरक्षण करण्यासाठी सज्ज झाला आहे.
रहाणेने भारतीय क्रिकेटमध्ये आपली नेतृत्व क्षमता सिद्ध केली आहे, विशेषतः 2020-21 च्या बॉर्डर-गावस्कर मालिकेत त्याने दाखवलेल्या प्रभावी नेतृत्वामुळे तो चर्चेत आला. आता आयपीएलमध्ये केकेआरचे नेतृत्व करण्याची संधी मिळाल्यामुळे तो आनंदित आहे. दरम्यान संघाच्या कर्णधारपदी निवड झाल्यानंतर अजिंक्य रहाणे म्हणाला, “केकेआरचे नेतृत्व करणे ही माझ्यासाठी मोठी जबाबदारी आणि सन्मान आहे. संघात अनेक प्रतिभावान खेळाडू आहेत. मी सर्वांसोबत काम करण्यास तसेच आमच्या जेतेपदाचे संरक्षण करण्याच्या आव्हानाला सामोरे जाण्यास उत्सुक आहे.”
केकेआरच्या व्यवस्थापनानेही रहाणेवर विश्वास दाखवला आहे. संघाचे मुख्य कार्यकारी अधिकारी (CEO) वेंकी मैसूर यांनी सांगितले, “अजिंक्य रहाणे हा अनुभवी आणि शांत स्वभावाचा नेतृत्व करणारा खेळाडू आहे. त्याचे मार्गदर्शन संघासाठी नक्कीच उपयुक्त ठरेल.”
संघाने वेंकटेश अय्यरला उपकर्णधार म्हणून नियुक्त केले आहे. अय्यरला यंदाच्या हंगामात 23.75 कोटी रुपयांना संघात समाविष्ट करण्यात आले होते, ज्यामुळे त्याच्या क्षमतेवर असलेला विश्वास स्पष्ट होतो. यावेळी बोलताना तो म्हणाला, “माझ्यासाठी ही मोठी संधी आहे. मी संघात माझ्या जबाबदाऱ्या चोख बजावण्याचा प्रयत्न करेन. आम्ही सर्व मिळून केकेआरसाठी सर्वोत्तम कामगिरी करू.”
केकेआर संघ यंदाच्या हंगामासाठी सज्ज असून, त्यात रिंकू सिंग, वरुण चक्रवर्ती, सुनील नरेन, आंद्रे रसेल, हर्षित राणा, रहमानुल्लाह गुरबाज यांसारख्या महत्वाच्या खेळाडूंचा समावेश आहे.
आयपीएल 2025 ची सुरुवात 22 मार्च रोजी होणार आहे. केकेआरचा पहिला सामना रॉयल चॅलेंजर्स बंगळुरूविरुद्ध रंगणार आहे. रहाणे आणि अय्यर यांच्या नेतृत्वाखाली संघ कशी कामगिरी करतो, हे पाहणे उत्सुकतेचे ठरणार आहे.
हेही वाचा-
रिषभ पंतचा जागतिक सन्मान.! ‘लॉरेस कमबॅक ऑफ द इयर’साठी नामांकन
वनडेमध्ये ‘या’ 3 भारतीय फलंदाजांनी ऑस्ट्रेलियाविरूद्ध दाखवला दम! आकडेवारी शानदार
हर्षित की वरूण? ऑस्ट्रेलिया विरुद्ध प्लेइंग इलेव्हन मध्ये कोणाचा होणार प्रवेश? जाणून घ्या एका क्लिकवर
Comments are closed.