आसारामला सहा महिन्यांचा अंतरिम जामीन मंजूर झाला

राजस्थान उच्च न्यायालयाचा मोठा दिलासा

वृत्तसंस्था/ जोधपूर

बलात्कार प्रकरणात जन्मठेपेची शिक्षा भोगत असलेल्या आसाराम बापूंना राजस्थान उच्च न्यायालयाने मोठा दिलासा दिला आहे. उच्च न्यायालयाने आसारामला वैद्यकीय कारणास्तव सहा महिन्यांचा अंतरिम जामीन मंजूर केला. या प्रकरणाची सुनावणी करणाऱ्या प्रभारी मुख्य न्यायाधीश संजीव प्रकाश शर्मा यांच्या अध्यक्षतेखालील खंडपीठाने आसाराम यांना अंतरिम जामीन मंजूर केला.

आसाराम बापू सध्या एका खासगी रुग्णालयात उपचार घेत आहेत. प्रकृती बिघडल्याचे कारण देत त्यांनी नियमित जामिनासाठी अर्ज केला होता. ते लैंगिक अत्याचार प्रकरणात जन्मठेपेची शिक्षा भोगत आहेत. 2013 च्या बलात्कार प्रकरणात जानेवारीच्या सुरुवातीला सर्वोच्च न्यायालयाने वैद्यकीय कारणास्तव आसारामना मार्च अखेरपर्यंत अंतरिम जामीन मंजूर केला होता. आश्रमातील मुलीवर बलात्कार केल्याबद्दल आसाराम बापू ऑगस्ट 2013 पासून तुरुंगात आहेत. एका 16 वर्षीय मुलीने केलेल्या तक्रारीनंतर त्यांना अटक करण्यात आली. दोन महिन्यांनंतर आसाराम आणि त्यांचा मुलगा नारायण साई यांच्यावर गुजरातमधील सुरत येथील त्यांच्या आश्रमात दोन बहिणींवर बलात्कार केल्याचा आरोप ठेवण्यात आला होता.