सध्या पाकिस्तान, अफगाणिस्तान आणि युएई यांच्यात तिरंगी मालिका सुरू आहे. मालिकेतील पहिल्या सामन्यात पाकिस्तानने अफगाणिस्तानचा 39 धावांनी पराभव केला. प्रथम फलंदाजी करताना पाकिस्तानने कर्णधार सलमान आगाच्या अर्धशतकाच्या जोरावर अफगाणिस्तानसमोर 183 धावांचे लक्ष्य ठेवले होते. या धावसंख्येचा पाठलाग करताना संपूर्ण अफगाणिस्तान संघ 143 धावांवर आटोपला. अफगाणिस्तानचा कर्णधार रशीद खानने 243.75 च्या स्ट्राईक रेटसह 16 चेंडूत 39 धावांची शानदार खेळी केली, परंतु तो संघाला विजय मिळवून देऊ शकला नाही. पाकिस्तानकडून हरिस रौफने सर्वाधिक 4 बळी घेतले.
नाणेफेक जिंकून प्रथम फलंदाजी करताना पाकिस्तानच्या संघाची सुरुवात चांगली झाली. पॉवरप्लेमध्ये संघाने 1 विकेट गमावून 54 धावा केल्या. टॉप-3 फलंदाज चांगल्या सुरुवातीचे मोठ्या धावसंख्येत रूपांतर करू शकले नाहीत. साहिबजादा फरहान 10 चेंडूत 21, सॅम अयुब 14 तर फखर जमान 20 धावांवर बाद झाले.
चौथ्या क्रमांकावर फलंदाजीला आलेल्या कर्णधार सलमान आगाने अशी चूक केली नाही, त्याने कर्णधारपदाची खेळी खेळताना 36 चेंडूत नाबाद 53 धावा केल्या. या दरम्यान, त्याला खालच्या मधल्या फळीतील फलंदाजांकडून चांगली साथ मिळाली. पाकिस्तानच्या संघाने निर्धारित 20 षटकांत 7 गडी गमावून 182 धावा उभारल्या. फरीद अहमदने दोन विकेट घेतल्या, तर रशीद-मुजीबसह 4 गोलंदाजांनी 1-1 विकेट घेतली.
१८३ धावांचा पाठलाग करण्यासाठी आलेल्या अफगाणिस्तानच्या संघाला पहिला धक्का बसला जेव्हा शाहीन आफ्रिदीने तिसऱ्या षटकाच्या शेवटच्या चेंडूवर इब्राहिम झदरान (9) ला बाद केले. यानंतर, रहमानउल्लाह गुरबाजने 38, सेदिकुल्लाह अटलने 23 आणि दरविश रसूलीने 21 धावा करून लहान डावात संघाला लक्ष्याच्या जवळ नेण्याचा प्रयत्न केला.
तथापि, खालच्या मधल्या फळीच्या अपयशामुळे अफगाणिस्तानची धावसंख्या घसरली. रशीद खान आठव्या क्रमांकावर आला. त्याने 1 चौकार आणि 5 षटकारांच्या मदतीने 39 धावा करून संघाला लक्ष्याच्या जवळ नेण्याचा प्रयत्न केला, परंतु तो अपयशी ठरला.
अफगाणिस्तान संघ पूर्ण 20 षटकांपर्यंतही टिकू शकला नाही. संघ 19.5 षटकांतच पाकिस्तानसमोर शरणागती पत्करली. तिरंगी मालिकेतील दुसरा सामना आज शारजाहमध्येच पाकिस्तान आणि यूएई यांच्यात खेळला जाणार आहे.
Comments are closed.