पाकिस्तान आणि बांगलादेश दरम्यान तीन सामन्यांची वनडे मालिका खेळवली जात आहे. या मालिकेसाठी पाकिस्तानने अनेक नवीन चेहऱ्यांना संधी दिली आहे, तर बाबर आझमसारख्या काही वरिष्ठ खेळाडूंना संघाबाहेर बसावे लागले आहे. बाबर आझमला वनडे संघातून बाहेर केल्यामुळे मोठा गदारोळ झाला होता. अनेकांचे असे मत होते की, खराब फॉर्ममुळे बाबरची संघात निवड झाली नाही. मात्र, आता या प्रकरणात एक नवीन वळण आले आहे.
पाकिस्तान क्रिकेट संघाचे निवडकर्ते आकिब जावेद यांनी शनिवारी, १४ मार्च रोजी एक धक्कादायक खुलासा केला. त्यांनी सांगितले की, बांगलादेशविरुद्धच्या वनडे मालिकेसाठी बाबर आझमची निवड झाली नाही कारण तो दुखापतग्रस्त होता. आश्चर्याची बाब म्हणजे, ही दुखापत त्याला टी-२० वर्ल्ड कप २०२६ दरम्यान झाली होती, परंतु याची माहिती खुद्द निवडकर्त्यांनाही नव्हती.
खरे तर, टी-२० वर्ल्ड कपसाठी बाबर आझमच्या निवडीवर आधीपासूनच प्रश्न उपस्थित केले जात होते. स्पर्धेत त्याची कामगिरीही अपेक्षेप्रमाणे झाली नाही. आता त्याच्या दुखापतीबाबत आकिब जावेद यांनी केलेल्या खुलाशानंतर पाकिस्तान क्रिकेटवर मोठी टीका होत आहे.
आकिब जावेद यांनी पत्रकार परिषदेत माहिती दिली की, बाबर आझमला वर्ल्ड कप दरम्यान दुखापत झाली होती. श्रीलंकेहून परतल्यानंतर डॉक्टरांनी त्याची तपासणी केली आणि याच कारणामुळे तो नॅशनल टी-२० स्पर्धेतही खेळू शकला नाही. त्यांच्या म्हणण्यानुसार, बाबरला खेळायची इच्छा होती, परंतु दुखापतीमुळे त्याला बाहेर राहावे लागले.
आकिब जावेद यांनी सांगितले की, त्यांनी याप्रकरणी पाकिस्तान क्रिकेट बोर्डाकडे (PCB) चौकशीची मागणी केली आहे. बाबर आझम आणि फखर जमान हे दोघेही अचानक अनफिट कसे झाले आणि वर्ल्ड कप संपल्यानंतरच निवडकर्त्यांना याची माहिती का देण्यात आली, असा सवाल त्यांनी उपस्थित केला आहे.
ते पुढे म्हणाले की, जेव्हा एखादा संघ मोठ्या स्पर्धेसाठी जातो, तेव्हा खेळाडूंची फिटनेस आणि दुखापतीवर लक्ष ठेवण्याची जबाबदारी टीम मॅनेजमेंटची असते, ज्यामध्ये मुख्य प्रशिक्षक आणि फिजिओ महत्त्वाची भूमिका बजावतात. अशा परिस्थितीत निवडकर्त्यांना वेळेवर माहिती मिळायला हवी होती.
Comments are closed.