भारतीय क्रिकेट नियामक मंडळाने (BCCI) टीम इंडियाचे मुख्य प्रशिक्षक गौतम गंभीर यांच्याबाबत सुरू असलेल्या सर्व चर्चा पूर्णपणे फेटाळून लावल्या आहेत. गेल्या काही दिवसांत प्रसारमाध्यमांमध्ये अशा बातम्या आल्या होत्या की, कसोटी क्रिकेटमधील खराब कामगिरीनंतर बोर्ड गौतम गंभीर यांच्या जागी नवीन प्रशिक्षकाच्या शोधात आहे. या भूमिकेसाठी व्हीव्हीएस लक्ष्मण यांचे नाव चर्चेत होते. आता BCCI च्या वरिष्ठ अधिकाऱ्यांनी या बातम्या पूर्णपणे बिनबुदाच्या असल्याचे म्हटले आहे.
बीसीसीआय उपाध्यक्ष राजीव शुक्ला यांनी स्पष्ट शब्दांत सांगितले आहे की, गौतम गंभीर यांना हटवण्याची किंवा त्यांच्या जागी नवीन प्रशिक्षक नियुक्त करण्याची कोणतीही योजना नाही. त्यांच्या मते, मीडियात सुरू असलेल्या चर्चांमध्ये काहीही तथ्य नाही. शुक्ला यांनी स्पष्ट केले की, बोर्ड पूर्णपणे गंभीर यांच्या पाठीशी उभे आहे आणि सध्या कोचिंग सेटअपमध्ये कोणत्याही बदलाचा विचार केला जात नाहीये.
यापूर्वी बीसीसीआय सचिव देवजीत सैकिया यांनीही हे अहवाल फेटाळून लावले होते. ते म्हणाले की, या बातम्या पूर्णपणे काल्पनिक आहेत आणि बोर्डाने कसोटी संघाच्या प्रशिक्षकात बदल करण्याबाबत कोणतेही पाऊल उचललेले नाही. सैकिया यांनी ठामपणे सांगितले की, या केवळ अफवा आहेत आणि बीसीसीआयचा याच्याशी कोणताही संबंध नाही.
खरे तर, भारताला अलीकडेच कसोटी क्रिकेटमध्ये सलग धक्के बसले आहेत. आधी न्यूझीलंडविरुद्धच्या घरच्या मालिकेत 0-3 असा पराभव आणि त्यानंतर दक्षिण आफ्रिकेविरुद्ध 0-2 असा व्हाईटवॉश मिळाल्याने प्रश्न उपस्थित झाले होते. या निकालांमुळे भारताचे जागतिक कसोटी चॅम्पियनशिपच्या (WTC) अंतिम फेरीत पोहोचणेही कठीण झाले आहे. याच काळात प्रशिक्षक बदलण्याच्या बातम्यांना वेग आला होता.
Comments are closed.