आशिया कपपूर्वी बासित अलीची चेतावणी, म्हणाले “भारत अशी कामगिरी…

वेस्ट इंडीज दौर्‍यात पाकिस्तान क्रिकेट संघाला मिळालेल्या लाजिरवाण्या पराभवानंतर संघावर टीकेची झोड उठली आहे. माजी पाकिस्तानी क्रिकेटपटू बासित
अली यांनी तर इतकेही म्हटले की, जर भारताने आशिया कपमध्ये पाकिस्तानविरुद्ध खेळण्याचा निर्णय घेतला, तर संघाला असा पराभव पत्करावा लागेल, ज्याची त्यांनी कधी कल्पनाही केली नसेल.

वेस्ट इंडीजविरुद्धच्या वनडे मालिकेला पाकिस्तानने चांगली सुरुवात केली होती. पहिला सामना जिंकून 1-0 अशी आघाडी घेतली होती. मात्र त्यानंतर संघाचे प्रदर्शन पूर्णपणे ढासळले. दुसऱ्या वनडेत पराभव पत्करल्यानंतर तिसऱ्या सामन्यात तर परिस्थिती आणखीच वाईट झाली. या सामन्यात पाकिस्तानची फलंदाजी ताशाच्या पत्त्यांसारखी कोसळली. पहिल्याच तीन षटकांत साइम अयूब, अब्दुल्ला शफीक आणि कर्णधार मोहम्मद रिजवान खाते न उघडताच पॅव्हेलियनमध्ये परतले. त्यानंतर गडी बाद होण्याची मालिका थांबलीच नाही आणि संपूर्ण संघ 30 षटकांत केवळ 92 धावांवर गारद झाला. कॅरिबियन वेगवान गोलंदाज जेडन सील्सने 8 षटकांत फक्त 18 धावा देत 6 बळी घेतले. त्यांच्या अफलातून गोलंदाजीमुळे पाकिस्तानला 202 धावांनी पराभव पत्करावा लागला आणि मालिका 1-2 ने वेस्ट इंडीजच्या नावावर झाली.

पाकिस्तानच्या या कामगिरीवर प्रतिक्रिया देताना बासित अली यांनी ‘द गेम प्लान’ या यूट्यूब चॅनलवर म्हटले, “मला वाटते भारताने आशिया कपमध्येही पाकिस्तानविरुद्ध खेळण्यास नकार द्यावा, जसे वर्ल्ड चॅम्पियनशिप ऑफ लिजेंड्सच्या अंतिम सामन्यात केलं होतं. जर असे झाले नाही, तर भारतीय संघ इतका फटकेबाजी करेल की पाकिस्तानने कधी कल्पनाही केली नसेल.”

संवादादरम्यान सूत्रधाराने विनोदाने म्हटले की, आत्ताच पाकिस्तानला अफगाणिस्तानविरुद्धही खेळायचे आहे आणि त्यांच्याविरुद्ध त्यांना काहीच संधी नाही. यावर बासित अली म्हणाले, “अफगाणिस्तानकडून हरल्यावर इथे फारसा फरक पडत नाही, पण भारताकडून पराभव झाला की संपूर्ण देश चिडून जातो.”