आयपीएल चाहत्यांसाठी मोठी बातमी! 2026 च्या हंगामाचे शेड्युल आणि बीसीसीआयचा ‘तो’ मोठा ट्विस्ट नक्की काय?

आयपीएल २०२६ च्या वेळापत्रकाबाबत (IPL 2026 Schedule) चर्चांना उधाण आले आहे. यापूर्वी असे म्हटले जात होते की, टी-२० विश्वचषकाच्या फायनलच्या दिवशी म्हणजेच गेल्या रविवारी (०८ मार्च) क्लोजिंग सेरेमनीपूर्वी आगामी हंगामाचे वेळापत्रक जाहीर केले जाईल, परंतु तसे झाले नाही. आता भारतीय क्रिकेट नियामक मंडळ म्हणजेच BCCI चे सचिव देवजीत सैकिया यांनी वेळापत्रकाबाबत एक मोठे अपडेट शेअर केले आहे. त्यांनी वेळापत्रक कोणत्या तारखेला जाहीर होणार हे सांगितले असून, त्यासोबतच एक मोठा ट्विस्टही स्पष्ट केला आहे.

​वृत्तसंस्था IANS शी बोलताना बीसीसीआय सचिवांनी सांगितले की, “आम्ही १२ मार्चपर्यंत आयपीएल २०२६ चे वेळापत्रक जाहीर करण्याचे नियोजन करत आहोत. सध्या आम्ही केवळ पहिल्या २० दिवसांचेच वेळापत्रक प्रसिद्ध करणार आहोत.”

​यापूर्वी समोर आलेल्या काही रिपोर्ट्समध्ये असे सांगण्यात आले होते की, वेळापत्रक दोन टप्प्यात जाहीर केले जाईल. आयपीएल गव्हर्निंग कौन्सिलने पहिल्या हाफचे वेळापत्रक निश्चित केल्याचेही बोलले जात होते. मात्र, सध्यातरी फक्त सुरुवातीच्या २० दिवसांचेच वेळापत्रक समोर येणार आहे.

​महत्त्वाची गोष्ट म्हणजे, आयपीएलचे वेळापत्रक जाहीर करण्यास होणारा उशीर हा निवडणुकांमुळे होत आहे. निवडणुकांमुळेच वेळापत्रक वेगवेगळ्या टप्प्यात प्रसिद्ध केले जाणार आहे. यावर्षी म्हणजेच २०२६ मध्ये पश्चिम बंगाल, आसाम आणि तामिळनाडूमध्ये विधानसभा निवडणुका होणार आहेत, ही बाब लक्षात घेऊनच आयपीएलचे वेळापत्रक तयार केले जात आहे. या तिन्ही राज्यांमध्ये आयपीएलचे सामने खेळवले जाणार आहेत.

​काही काळापूर्वी समोर आलेल्या एका रिपोर्टनुसार, आयपीएलच्या आगामी हंगामाची सुरुवात २८ मार्चपासून होऊ शकते, तर अंतिम सामना ३१ मे रोजी खेळवला जाऊ शकतो. मात्र, विशेष बाब म्हणजे याआधी ही तारीख २६ मार्च ते ३० मे दरम्यान सांगितली जात होती. खरी तारीख तर अधिकृत वेळापत्रक जाहीर झाल्यानंतरच स्पष्ट होईल. आता या स्पर्धेची सुरुवात कधी होते आणि वेळापत्रक किती टप्प्यात येते, हे पाहणे उत्सुकतेचे ठरेल.