आला थंडीचा महिना, पण शेकोटी पेटवू नका!पालिका एक हजार वसूल करणार; कारवाईसाठी 95 भरारी पथके तैनात

>> देवेंद्र भगत

थंडीची चाहूल लागली असताना मुंबईमध्ये वाढते प्रदूषण रोखण्यासाठी आता शेकोटी पेटवणे, उघडय़ावर कचरा जाळण्यास पालिकेने बंदी घातली असून नियम मोडणाऱयांकडून एक हजार रुपयांचा दंड वसूल करण्यात येणार आहे. विशेष म्हणजे पालिकेने या वर्षी दंडात दहा पट वाढ केली आहे. तर प्रदूषण नियंत्रण 27 प्रकारच्या नियमावलीवर नजर ठेवण्यासाठी 95 भरारी पथकांची नेमणूकही केली आहे. त्यामुळे ‘आला थंडीचा महिना, शेकोटी पेटवू नका’, असेच म्हणण्याची वेळ मुंबईकरांवर आली आहे.

हिवाळय़ातील थंड वातावरणामुळे प्रदूषके हवेत साचून राहतात. त्यात भर पडणार नाही यासाठी पालिकेने जारी केलेली नियमावली सर्वांनीच काटेकोरपणे पाळावी. जेणेकरून मुंबईतील प्रदूषणाला आळा घालण्यास हातभार लागेल.
-अविनाश काटे, उपायुक्त, पर्यावरण व वातावरणीय बदल विभाग

साडेआठ हजार जणांना नोटिसा

मुंबईत सुरू असलेल्या तीन हजारांवरील इमारत बांधकामे आणि रस्तेकामांसह धूळ निर्माण होणाऱया सुमारे साडेआठ हजार संबंधितांना पालिकेने नोटीस बजावून प्रदूषण नियंत्रण नियमावली पाळण्याचे आदेश दिले आहेत. बांधकामाच्या ठिकाणी प्रदूषण मापक यंत्र बसवण्याचे निर्देशही पालिकेने दिले आहेत.

वॉचमन, कामगारांना पर्याय द्या

– सुरक्षा कर्मचारी, बांधकामाच्या ठिकाणी राहणारे कामगार रात्री शेकोटय़ा पेटवतात. उघडय़ावर कचरा किंवा लाकडे जाळून जेवण करतात. मच्छर पळवण्यासाठी धूर निर्माण करतात.

– त्यामुळे संबंधित बांधकाम मालक, सोसायटय़ांनी आपल्या सुरक्षा कर्मचाऱयाला थंडीपासून बचाव करणारी साधने द्यावीत, कंत्राटदारांनी बांधकामाच्या ठिकाणी जेवण बनवण्याची परवानगी न देता कामगारांना तयार जेवण द्यावे.