दिल्लीच्या मंगोलपुरीमध्ये सार्वजनिक ठिकाणी चाकूहल्ला, रस्त्यावरून चालणाऱ्यांवर चाकूने हल्ला, ६ जण जखमी

राजधानी दिल्लीतील मंगोलपुरी भागात रस्त्यावरून चालणाऱ्यांवर चाकू हल्ला केल्याची खळबळजनक घटना समोर आली आहे. एका व्यक्तीने सार्वजनिक ठिकाणी लोकांना टार्गेट केल्याचे सांगितले जात आहे, त्यामुळे परिसरात गोंधळ उडाला आहे. या घटनेत 6 जण जखमी झाले आहेत. सर्व जखमींना उपचारासाठी रुग्णालयात दाखल करण्यात आले असून, त्यांच्यावर उपचार सुरू आहेत. घटनेची माहिती मिळताच पोलिसांनी घटनास्थळ गाठून या प्रकरणाचा तपास सुरू केला. या हल्ल्यामागील कारणे आणि घटनेत सहभागी असलेल्या व्यक्तीची माहिती पोलीस गोळा करत आहेत. या घटनेनंतर परिसरात घबराटीचे वातावरण आहे.

2 जखमींना सफदरजंग रुग्णालयात दाखल करण्यात आले

पोलिसांनी दिलेल्या माहितीनुसार, काही लोकांनी पादचाऱ्यांवर चाकूने हल्ला केला. या घटनेत किमान सहा जण जखमी झाले आहेत. पोलिसांनी सांगितले की, मंगोलपुरीच्या एल ब्लॉकमधील तीन वेगवेगळ्या रस्त्यावर चाकूहल्ला करण्याच्या या घटना घडल्या आहेत. अचानक झालेल्या हल्ल्यानंतर परिसरात गोंधळाचे वातावरण निर्माण झाले होते. या घटनेत जखमी झालेल्या सर्वांना उपचारासाठी संजय गांधी मेमोरियल हॉस्पिटलमध्ये नेण्यात आले. यातील दोन जखमींची प्रकृती लक्षात घेता त्यांना पुढील उपचारासाठी सफदरजंग रुग्णालयात पाठवण्यात आले आहे.

सीसीटीव्ही फुटेजवरून आरोपींचा शोध, काही संशयित अल्पवयीन आहेत

मंगोलपुरी येथे झालेल्या चाकूहल्लाच्या घटनेनंतर पोलिसांनी आरोपींची ओळख पटवून त्यांना अटक करण्यासाठी तपास सुरू केला आहे. पोलीस परिसरातील सीसीटीव्ही कॅमेऱ्यांचे फुटेज तपासत आहेत. प्राथमिक माहितीनुसार काही संशयित अल्पवयीन असल्याचे सांगण्यात येत आहे. पोलीस जखमींची चौकशी करत असून घटनास्थळाजवळ राहणाऱ्या लोकांकडूनही माहिती गोळा केली जात आहे. सीसीटीव्ही फुटेजच्या माध्यमातून हल्ल्यात सहभागी असलेल्यांची ओळख पटवण्याचे प्रयत्न सुरू आहेत. पोलिसांच्या प्राथमिक तपासात जुन्या वैमनस्यातून हा हल्ला झाल्याचा संशय आहे. मात्र, हल्लेखोरांनी काही लोकांना लुटल्याचा आरोप स्थानिकांनी केला आहे.