दोनवेळा स्तनाचा कर्करोग, दोन्ही किडन्या निकामी.. अरुणा इराणी यांनी मुलाखतीत केले धक्कादायक खुलासे

अरुणा इराणी यांची गणना बॉलिवूडमधील सशक्त अभिनेत्रींमध्ये केली जाते. त्यांनी अभिनयाच्या जोरावर काही दशकांपूर्वीपासून इंडस्ट्रीवर राज्य केले आहे. वयवर्षे 80 असलेल्या अरुणा इराणी यांनी 500 हून अधिक चित्रपटांमध्ये काम केले आहे. मुख्य भूमिका, गाजलेली नृत्यगीते, व्हॅंम्प ते आईच्या भूमिका. अशा विविधांगी भूमिका त्यांनी एकामागून एक साकारल्या आहेत. अलिकडेच एका मुलाखतीदरम्यान त्यांनी त्यांच्या आयुष्याशी संबंधित अनेक खुलासे केले आहेत. हे खुलासे ऐकून त्यांचे चाहते हैराण झाले आहेत. मुलाखतीदरम्यान अरुणा इराणी यांनी सांगितले की, त्यांनी एकदा नाही तर दोनदा स्तनाच्या कर्करोगाशी झुंज दिली आहे.

अलिकडेच झालेल्या मुलाखतीच्या माध्यमातून अरुणा इराणी म्हणाल्या की, एके दिवशी शूटिंग दरम्यान स्तनामध्ये काहीतरी गाठ आहे आणि ती दुखत असल्याचे जाणवू लागले. डाॅक्टरकडे गेल्यानंतर त्यांना कळले की, ही गाठ साधीसुधी नाही तर कॅन्सरची गाठ आहे. डॉक्टरांनी त्यांना गाठ काढून टाकण्याचा सल्ला दिला. तसेच यावर अधिक सजगता म्हणून डॉक्टरांनी केमोथेरपी सुचवली. परंतु केस गळण्याच्या आणि त्वचेतील बदलांच्या भीतीमुळे त्यांनी केमोथेरपी करण्यास नकार दिला. त्यानंतर त्या बऱ्या झाल्या. परंतु पुन्हा एकदा 2020 मध्ये कोविडच्या अगदी आधी, त्यांना स्तनाचा कर्करोग पुन्हा झाल्याचे निदान झाले. त्यावेळी मात्र केमोथेरपी घ्यावी लागली. यावर अधिक भाष्य करताना त्या म्हणाल्या, वयाच्या 60 व्या वर्षी मधुमेह झाला होता आणि त्यानंतर त्यांच्या दोन्ही किडन्या निकामी झाल्या.

या मुलाखतीत अरुणा इराणी यांनी रेखाबद्दल धक्कादायक खुलासा केला आहे. ‘औरत औरत औरत’ चित्रपटात त्यांची भूमिका कशी कमी करण्यात आली हे त्यांनी सांगितले. रेखामुळेच त्यांना या चित्रपटातून काढून टाकण्यात आले होते हेही त्यांनी सांगितले. साइनिंगची रक्कम दिल्यानंतरही त्यांना चित्रपटातून का काढून टाकण्यात आले असे निर्मात्यांना विचारले असता, निर्माते म्हणाले रेखा यांना तुम्ही त्या चित्रपटात नको आहात.