आता मारुती सुझुकी खरेदी करणे महागणार, १ ऑगस्टपासून लागू होणार नवीन किमती

देशातील सर्वात मोठी कार उत्पादक कंपनी मारुती सुझुकीने ग्राहकांना मोठा धक्का दिला आहे. 1 ऑगस्ट 2026 पासून मारुती सुझुकीच्या सर्व गाड्या 30,000 रुपयांनी महागणार आहेत. याबाबत कंपनीचे म्हणणे आहे की, कच्च्या मालाच्या वाढत्या किमती आणि उत्पादन खर्चात सातत्याने वाढ होत असल्याने त्यांना हा निर्णय घ्यावा लागला आहे. गेल्या अनेक महिन्यांत कंपनीने खर्च कमी करण्यासाठी अनेक पावले उचलली असली तरी कच्च्या मालाच्या वाढत्या किमतीमुळे आता कंपनी कारच्या किमती वाढवणार आहे.

मारुती सुझुकी कंपनीच्या म्हणण्यानुसार, स्टील, ॲल्युमिनियम, मौल्यवान धातू, इतर कच्चा माल, लॉजिस्टिक आणि ऑपरेशनल खर्चात सातत्याने वाढ होत असल्याने कंपनीला जुन्या किमतीत कार विकणे कठीण झाले आहे. यामुळेच कंपनीने हा निर्णय घेतला आहे.

प्रत्येक मॉडेलच्या कारवर वेगवेगळी वाढ केली जाईल

मारुती सुझुकीच्या सर्व मॉडेल्सच्या किमतींमध्ये एकसमान वाढ होणार नसल्याचे कंपनीने स्पष्ट केले आहे. वेगवेगळ्या कार आणि व्हेरियंटनुसार किंमत वाढेल. याचा सरळ अर्थ असा आहे की काही मॉडेल्समध्ये कमी वाढ दिसेल आणि काहींमध्ये अधिक वाढ होईल. परंतु कंपनीने हे स्पष्ट केले आहे की, कमाल किंमत केवळ 30,000 रुपयांपर्यंत वाढवली जाईल.

मे 2026 मध्येही कंपनीने सांगितले होते की ते खर्च कमी करण्यासाठी सतत प्रयत्न करत आहेत. तर फेब्रुवारी 2026 मध्ये मारुतीने सोने, चांदी आणि इतर मौल्यवान धातूंसह अनेक अत्यावश्यक कच्च्या मालाच्या किमती सातत्याने वाढत असल्याचे म्हटले होते. अशा परिस्थितीत कंपनी किमतीत आणखी एक वाढ करण्याचा विचार करत होती. त्याचवेळी या बातमीचा परिणाम शेअर बाजारावरही दिसून आला. मंगळवारी दुपारी 3:29 च्या सुमारास, मारुतीचा शेअर बीएसईवर 122.55 रुपयांच्या वाढीसह 13,630 रुपयांवर व्यवहार करताना दिसला.

भारतात या मॉडेल्सना चांगली मागणी आहे

जेव्हा मारुती सुझुकीच्या नवीन किमती लागू होतील तेव्हा तुम्हाला पूर्वीपेक्षा जास्त पैसे मोजावे लागतील. भारतात Alto K10, WagonR, Swift, Baleno, Brezza, Fronx, Dzire, Ertiga आणि Grand Vitara सारख्या मारुती सुझुकीच्या गाड्यांना देशभरात चांगली मागणी आहे.