युक्रेनच्या ओडेसामध्ये मालवाहू जहाजावर हल्ला, दोन भारतीय बेपत्ता

कीव, 26 जुलै 2026: युक्रेनमधील ओडेसा बंदरावर 'एमव्ही एजीएन रॅगनार' नावाच्या व्यावसायिक जहाजावर हल्ला करण्यात आला. या जहाजावर चार भारतीय नागरिक होते. या हल्ल्याबाबत, युक्रेनमधील भारतीय दूतावासाने रविवारी सांगितले की, ते ओडेसा बंदरातील या घटनेनंतरच्या परिस्थितीवर बारकाईने लक्ष ठेवून आहेत.

भारतीय दूतावासाने 'X' वर माहिती दिली आहे की चार भारतीय क्रू मेंबर्सपैकी दोन सुरक्षित असल्याची पुष्टी झाली आहे. उर्वरित दोन सदस्यांच्या माहितीची प्रतीक्षा आहे.

शोध आणि बचाव कार्य सुरू असल्याचे दूतावासाने म्हटले आहे. आम्ही युक्रेनच्या अधिकाऱ्यांच्या सतत संपर्कात आहोत. हल्ल्यानंतर दूतावासाने युक्रेनमध्ये राहणाऱ्या भारतीयांसाठी हेल्पलाइनही जाहीर केली आहे.

ईमेल: cons.kyiv@mea.gov.in, cons1.kyiv@mea.gov.in

आपत्कालीन क्रमांक: +३८०९३३५५९९५८ (अजी कुमार, द्वितीय सचिव)

ओडेसा हे काळ्या समुद्रावर वसलेले युक्रेनचे सर्वात मोठे बंदर आहे. फेब्रुवारी 2022 मध्ये रशियाच्या हल्ल्यापासून हे शहर सतत क्षेपणास्त्र आणि ड्रोन हल्ल्यांचे लक्ष्य बनले आहे. त्यामुळे सागरी व्यापारही उद्ध्वस्त झाला आहे.

सध्या सुरू असलेल्या संघर्षामुळे भारत सरकारने आपल्या नागरिकांना युक्रेनमध्ये न जाण्याचा सल्ला दिला आहे. तेथे राहणाऱ्या भारतीयांना शक्य ती सर्व मदत केली जात असल्याचे दूतावासाने म्हटले आहे.