ख्रिस गेल की आणखी कोणी? एकाच आयपीएल सीझनमध्ये सर्वात जास्त षटकार मारणाऱ्या खेळाडूंची यादी, जाणून घ्या सविस्तर

इंडियन प्रीमियर लीगचा पहिला सीझन २००८ मध्ये खेळला गेला, तेव्हापासून दरवर्षी या लीगचे आयोजन केले जात आहे. काळानुसार या लीगचा दर्जा सतत वाढत गेला आणि आज ही जगातील सर्वात मोठी क्रिकेट लीग बनली आहे. गेल्या १९ वर्षांत या लीगमध्ये अनेक विक्रम प्रस्थापित झाले, जे मोडणे आजही अशक्य वाटते. असाच एक विक्रम म्हणजे एका सीझनमध्ये सर्वाधिक षटकार ठोकण्याचा विक्रम.

​आयपीएलच्या एका सीझनमध्ये सर्वाधिक षटकार मारण्याचा विक्रम वेस्ट इंडिजचा माजी फलंदाज ख्रिस गेल याच्या नावावर आहे, ज्याने २०१२ मध्ये रॉयल चॅलेंजर्स बंगलोरकडून खेळताना हा विक्रम केला होता. हा विक्रम आज २-२६ मध्येही अबाधित आहे. हा विक्रम मोडण्याच्या जवळ २०१९ मध्ये आंद्रे रसेल पोहोचला होता, पण त्याला तो मोडता आला नाही. तुम्हाला हे जाणून आश्चर्य वाटेल की एका आयपीएल आवृत्तीत सर्वाधिक षटकार मारणाऱ्या खेळाडूंच्या टॉप-५ यादीत ३ वेळा फक्त गेलचेच नाव आहे, तर यामध्ये एकाही भारतीयाचा समावेश नाही.

​आयपीएलच्या एका सीझनमध्ये सर्वाधिक षटकार मारण्याचा विक्रम ख्रिस गेलच्या नावावर आहे. वेस्ट इंडिजच्या या खेळाडूने २०१२ मध्ये हा विक्रम केला होता, ज्या सीझनमध्ये त्याने रॉयल चॅलेंजर्स बंगलोरसाठी खेळताना एकूण ५९ षटकार लगावले होते. हा विक्रम आजपर्यंत कोणालाही मोडता आलेला नाही. गेलने त्या सीझनमध्ये १५ सामन्यांत ७३३ धावा केल्या होत्या, ज्यात १ शतक आणि ७ अर्धशतकांचा समावेश होता.

​वेस्ट इंडिजचाच आंद्रे रसेल हा ख्रिस गेलचा विक्रम मोडण्याच्या अगदी जवळ पोहोचला होता, पण त्याला यश आले नाही. आयपीएलच्या एका सीझनमध्ये सर्वाधिक षटकार मारणाऱ्यांच्या यादीत रसेल दुसऱ्या स्थानावर आहे. रसेलने २०१९ मध्ये कोलकाता नाईट रायडर्ससाठी खेळताना एकूण ५२ षटकार मारले होते.

​या यादीत तिसऱ्या क्रमांकावर देखील ख्रिस गेलच आहे, ज्याने २०१३ मध्ये रॉयल चॅलेंजर्स बंगलोरसाठी खेळताना एकूण ५१ षटकार ठोकले होते. याच सीझनमध्ये त्याने एकाच सामन्यात १७ षटकार मारण्याचा विक्रमही केला होता आणि हा विक्रमही आजपर्यंत कोणालाही मोडता आलेला नाही. ही तीच खेळी आहे ज्यामध्ये त्याने एकूण १७५ धावा केल्या होत्या. ही आयपीएल इतिहासातील सर्वात मोठी वैयक्तिक खेळी आहे.

​इंग्लंडचा खेळाडू जोस बटलर चौथ्या क्रमांकावर आहे. बटलरने २०२२ मध्ये राजस्थान रॉयल्ससाठी खेळताना एकूण ४५ षटकार मारले होते. ३५ वर्षीय बटलर २०१८ ते २०२४ पर्यंत राजस्थानसाठी खेळला असून, २०२५ पासून तो गुजरात टायटन्सकडून खेळत आहे.

​आयपीएलच्या एका सीझनमध्ये सर्वाधिक षटकार मारणाऱ्यांच्या टॉप-५ यादीत ख्रिस गेलचे नाव तब्बल तीन वेळा येते. या यादीत पाचव्या क्रमांकावर २०११ चा सीझन आहे, जेव्हा गेलने एकूण ४४ षटकार मारले होते. या आवृत्तीतही तो आरसीबीसाठीच (RCB) खेळला होता.