नौदलाची नेटवर्क क्षमता वाढवण्यासाठी उपयुक्त
मंडळ/श्रीहरिकोटा
भारतीय अंतराळ संशोधन संस्था (इस्रो) येत्या रविवारी म्हणजेच 2 नोव्हेंबर रोजी नौदलासाठी विकसित केलेला ‘सीएमएस-03’ उपग्रह प्रक्षेपित करणार आहे. हा उपग्रह नौदलाच्या नेटवर्क-केंद्रित युद्ध क्षमता वाढवेल. इस्रो प्रमुख व्ही. नारायणन यांनी बेंगळूर येथील कार्यक्रमात बोलताना या उपग्रहाच्या प्रक्षेपणाबद्दल माहिती दिली. श्रीहरिकोटा येथील सतीश धवन अंतराळ केंद्रातून हा उपग्रह प्रक्षेपित केला जाईल.
‘सीएमएस-03’ हा लष्करी संप्रेषण उपग्रह नौदलाच्या संप्रेषण आणि देखरेख क्षमता वाढवेल. हिंदी महासागर क्षेत्रात चीनने निर्माण केलेल्या आव्हानांना पाहता, लष्करी समन्वय, गुप्तचर माहिती सामायिकरण आणि जलद धोक्याच्या प्रतिसादासाठी प्रगत संप्रेषण महत्त्वपूर्ण आहेत. ‘सीएमएस-03’मध्ये अनेक फ्रिक्वेन्सी बँड वापरल्यामुळे ते आवाज, व्हिडिओ आणि डेटा प्रसारित करण्यास उपयुक्त ठरणार आहे. साहजिकच भारताच्या किनारपट्टीपासून 2000 किलोमीटर अंतरावर पसरलेल्या हिंदी महासागर प्रदेशातील नौदल जहाजे, पाणबुड्या, विमाने आणि किनारी कमांड सेंटर्समध्ये अखंड संवाद साधता येईल.
‘सीएमएस-03’मुळे नौदलाच्या ताफ्यातील जहाजे आणि पाणबुड्या महासागराच्या दुर्गम भागातही संपर्क राखू शकतील. हा उपग्रह एकाच वेळी 50 हून अधिक नौदल प्लॅटफॉर्मना जोडण्यास सक्षम असेल. हा उपग्रह अंदमान-निकोबार, लक्षद्वीप यांसारख्या बेटांसह संपूर्ण हिंद महासागर प्रदेशात सतत उच्च-बँडविड्थ संप्रेषण कव्हरेज प्रदान करेल. तसेच पाळत ठेवणे, टोही, नेव्हिगेशन आणि हवामान निरीक्षणासाठी देखील उपयुक्त ठरेल. अधिक शक्तिशाली अॅम्प्लिफायर आणि संवेदनशील रिसीव्हर्ससह सुसज्ज असलेला हा उपग्रह कठीण परिस्थितीतही विश्वसनीय संप्रेषण राखणार असल्याची माहिती देण्यात आली.
Comments are closed.