केंद्रावर सातत्याने हल्लाबोल करणाऱ्या देशातील सर्वात जुना पक्ष असलेल्या काँग्रेसला आता सरकारकडून मोठा दिलासा मिळाला आहे. काँग्रेसला 24, अकबर रोड, दिल्ली येथील बंगला 28 मार्चपर्यंत रिकामा करण्याची नोटीस देण्यात आली होती, मात्र आता पक्षाला हा बंगला रिकामा करण्याची गरज नाही. तर यापूर्वी केंद्रीय गृहनिर्माण आणि शहरी व्यवहार मंत्रालयाच्या (MoHUA) भूमी आणि विकास कार्यालयाने (L&DO) बंगला रिकामा करण्याची नोटीस दिली होती.
काँग्रेसच्या वतीने सांगण्यात आले की, केंद्राने 13 मार्च रोजी 2 बंगले रिकामे करण्याबाबत नोटीस पाठवली होती आणि पक्षाला 24 अकबर रोडवरील कार्यालय तसेच 5 रायसीना रोड येथील भारतीय युवक काँग्रेसचे कार्यालय शनिवार (28 मार्च) पर्यंत रिकामे करण्यास सांगण्यात आले होते. काँग्रेस या नोटीसवर खूश नव्हती आणि बंगला खाली करण्याच्या नोटिशीच्या विरोधात कोर्टात जाण्याचा विचार करत होता.
इंदिरा गांधींच्या काळापासून काँग्रेसचे कार्यालय
यापूर्वी, केंद्राकडून आलेल्या नोटीसमुळे पक्षात खळबळ उडाली होती कारण इंदिरा गांधींच्या काळापासून २४, अकबर रोड हे काँग्रेसचे कार्यालय होते. हे कार्यालय काँग्रेसच्या गौरवशाली प्रवासाचे आणि अनेक ऐतिहासिक निर्णयांचे व घडामोडींचे साक्षीदार राहिले आहे.
मात्र, काँग्रेसने आपल्या नवीन आणि आलिशान कार्यालयात स्थलांतर केले आहे. गेल्या वर्षी जानेवारीमध्ये काँग्रेस अध्यक्ष मल्लिकार्जुन खरगे आणि काँग्रेस संसदीय पक्षाच्या अध्यक्षा सोनिया गांधी यांनी नवी दिल्लीत पक्षाच्या नवीन मुख्यालय इंदिरा भवनचे उद्घाटन केले होते. या सोहळ्याला लोकसभेतील विरोधी पक्षनेते राहुल गांधी, खासदार प्रियांका गांधी वढेरा, पक्षाचे सरचिटणीस केसी वेणुगोपाल आणि पक्षाचे अनेक ज्येष्ठ नेतेही उपस्थित होते.
काँग्रेसचे नवे कार्यालय 'इंदिरा भवन'
केंद्राशी संबंधित सूत्रांनी सांगितले की, केंद्रीय गृहनिर्माण आणि शहरी व्यवहार मंत्रालयाच्या (MoHUA) भूमी आणि विकास कार्यालयाच्या (L&DO) 2006 च्या धोरणांतर्गत ही नोटीस देण्यात आली आहे. या धोरणानुसार कोणत्याही राष्ट्रीय पातळीवरील राजकीय पक्षाला कार्यालय बांधण्यासाठी जमीन दिली जाऊ शकते. जर त्यांनी हे वाटप मान्य केले, तर जमिनीचा ताबा घेतल्याच्या तारखेपासून पुढील 3 वर्षांच्या आत त्यांना पूर्वी वाटप केलेले सर्व बंगले किंवा इतर जागा रिकामी कराव्या लागतील.
दीनदयाल उपाध्याय (DDU) मार्गावरील भूखंडावर आपले नवीन कार्यालय बांधण्यासाठी काँग्रेसने 2009 मध्ये बांधकाम सुरू केले होते. इंदिरा भवन नावाचे हे कार्यालय गेल्या वर्षी 2025 मध्ये पूर्ण झाले. नवीन मुख्यालय बांधल्यानंतरही, काँग्रेसने 24, अकबर रोड (जे 1978 पासून पक्षाचे मुख्यालय आहे) आणि रायसीना रोड या दोन्ही जागा ताब्यात घेतल्या.
स्वातंत्र्यानंतर हा बंगला बर्मा हाऊस बनला
24, अकबर रोड बंगला हे 1978 पासून काँग्रेसचे मुख्यालय आहे. त्यानंतर हा बंगला आंध्रचे खासदार जी व्यंकट स्वामी यांच्या नावावर देण्यात आला. पुढे ते काँग्रेसचे मुख्यालय बनले. हा बंगला सोनिया गांधी यांच्या निवासस्थान 10, जनपथला लागून आहे. या दोन बंगल्यांमध्ये एक गेट आहे, त्यामुळे सोनिया कधीही पक्षाच्या मुख्यालयात पोहोचू शकतात.
जेव्हा सर एडविन लुटियन्स यांच्याकडे नवी दिल्ली विकसित करण्याची जबाबदारी सोपवण्यात आली तेव्हा त्यांनी 1911 ते 1925 दरम्यान या 28 चौरस किलोमीटर परिसरात अनेक बंगले बांधले. स्वातंत्र्यापूर्वी हा बंगला ब्रिटिश लष्करी अधिकारी सर रेजिनाल्ड मॅक्सवेल यांना देण्यात आला होता. पण स्वातंत्र्यानंतर 1960 मध्ये तत्कालीन पंतप्रधान जवाहरलाल नेहरू यांनी याला बर्मा हाऊस (म्यानमारच्या राजदूताचे घर) बनवण्याची परवानगी दिली.
Comments are closed.