मध्यपूर्वेतील परिस्थितीचे काँग्रेसचे राजकारणीकरण

केरळ दौऱ्यावेळी प्रंतप्रधान मोदींची टीका : भारतीयांच्या संरक्षणासाठी सरकार कटिबद्ध असल्याचा निर्वाळा

वृत्तसंस्था/ एर्नाकुलम

पंतप्रधान नरेंद्र मोदी यांनी बुधवारी काँग्रेस पक्षावर आखाती प्रदेशात सुरू असलेल्या युद्धाचे राजकारण करण्याचा आरोप केला. केंद्र सरकार परदेशात अडकलेल्या भारतीयांच्या सुरक्षिततेची खात्री करण्यासाठी सतत काम करत आहे, तर काँग्रेस पक्ष या गंभीर आंतरराष्ट्रीय संकटाला राजकीय मुद्दा बनवण्याचा प्रयत्न करत असल्याचे ते म्हणाले. केरळमधील एर्नाकुलम येथे एका कार्यक्रमात बोलताना त्यांनी काँग्रेसवर सडकून टीका केली.

पंतप्रधान नरेंद्र मोदी यांनी काँग्रेस पक्षावर मध्य-पूर्वेतील सुरू असलेल्या युद्धाबाबत अफवा पसरवत आणि देशातील परिस्थितीचे राजकारण करत असल्याचा आरोप केला. आज पश्चिम आशियात काय चालले आहे याबद्दल तुम्ही सर्वजण चिंतित असणे स्वाभाविक आहे. आमचे लाखो भाऊ आणि बहिणी तिथे काम करतात. तुम्ही हे लक्षात ठेवले पाहिजे की आज देशात भाजप-एनडीए सत्तेत आहे. जेव्हा जेव्हा आमच्या कोणत्याही देशवासीयांना संकट आले तेव्हा आम्ही त्यांचे रक्षण करण्यासाठी आमचे सर्व प्रयत्न केले आहेत, असे पंतप्रधानांनी ठामपणे सांगितले.

काँग्रेसमुळे परिस्थिती आणखी बिकट

पंतप्रधान मोदी म्हणाले, ‘एवढ्या मोठ्या जागतिक संकटात काँग्रेस पक्ष राजकारण शोधण्याचा प्रयत्न करत आहे हे मोठे दुर्दैव आहे. काँग्रेस पक्ष जाणूनबुजून चिथावणीखोर आणि बेजबाबदार विधाने करत आहे जेणेकरून परिस्थिती आणखी बिकट होईल आणि आपले लोक तिथे अडचणीत येतील. ते मोदींना शिव्या देण्याचे रील्स तयार करण्याची मोहीम सुरू करू शकतात. हा त्यांचा खेळ आहे. मला समाधान आहे की आपल्या सर्व मैत्रीपूर्ण आखाती देशांच्या सरकारे देखील आपल्या देशातील नागरिकांची पूर्ण काळजी घेत आहेत.’

काँग्रेस आणि डावे अफवा पसरवण्यात गुंग

काँग्रेस आणि डावे पक्ष देशात अफवा पसरवण्यात गुंतले आहेत असा आरोप पंतप्रधान मोदी यांनी केला. आजही युद्धाच्या या काळात काँग्रेस-डावे आणि त्यांची परिसंस्था देशात भीती निर्माण करण्यासाठी त्यांची सर्व शक्ती खर्च करत आहेत. मी देशाला काँग्रेस-डावे पसरवणाऱ्या अफवांपासून सावध आणि सतर्क राहण्याचे आवाहन करू इच्छितो, असे आवाहन पंतप्रधानांनी व्यासपीठावरून जाहीरपणे केले.

पंतप्रधान मोदींनी रॅलीला संबोधित करताना पुन्हा एकदा आत्मनिर्भर भारताचा उल्लेख केला. ते म्हणाले, एकीकडे, भाजप-एनडीए देशाला स्वावलंबी बनवण्याचे काम करत आहे. दुसरीकडे, काँग्रेस आणि डावे आत्मनिर्भर भारत मोहिमेची खिल्ली उडवण्यात व्यस्त आहेत. काँग्रेस आणि डाव्यांनी एकत्र सरकारे चालवली आहेत. त्यांनी देशाला परदेशांवर अधिकाधिक अवलंबून बनवले असल्याचा आरोपही पंतप्रधानांनी केला. सध्याच्या संकटाने पुन्हा एकदा स्वावलंबीतेचे महत्त्व सिद्ध केले आहे. अलिकडच्या काळात सरकारने ऊर्जा क्षेत्रात इतर देशांवरील अवलंबित्व कमी करण्यासाठी अनेक पावले उचलली आहेत. आम्ही आमची सौर ऊर्जा क्षमता वाढवली आहे. केरळमध्ये सौर प्रकल्पावरही काम सुरू झाले आहे. पेट्रोल आणि डिझेलवरील अवलंबित्व कमी करण्यासाठी इलेक्ट्रिक वाहनांना प्रोत्साहन दिले जात असल्याचेही पंतप्रधानांनी सांगितले.