फरिदाबाद हल्ल्यानंतर डॉ. उमर घाबरला; घाईघाईने आखला दिल्लीत स्फोटाचा प्लॅन? तपासात धक्कादायक माह

दिल्ली: दिल्लीतील लाल किल्ला मेट्रो स्टेशनबाहेर झालेला स्फोट (Delhi Red Fort Blast) हा दहशतवादी हल्ला होता. आतापर्यंत नऊ जणांचा मृत्यू झाला आहे आणि २० जण जखमी झाले आहेत. तपास यंत्रणांना असे वाटते की स्फोटके (Delhi Red Fort Blast) एका कारमध्ये ठेवण्यात आली होती आणि त्यात स्फोट (Delhi Red Fort Blast) झाला होता. यंत्रणांच्या मते, हा एक आत्मघातकी हल्ला होता. आतापर्यंतच्या तपासात दिल्ली लाल किल्ला स्फोटाचा संबंध फरिदाबाद दहशतवादी मॉड्यूलशी असल्याचे समोर आले आहे.(Delhi Red Fort Blast)

Delhi Red Fort Blast: कारमध्ये सापडलेल्या मृतदेहाची डीएनए चाचणी पोलिस करणार

घटनास्थळावरून जप्त केलेल्या कारमध्ये सापडलेल्या मृतदेहाची डीएनए चाचणी पोलिस करणार आहेत, जेणेकरून कारमधील व्यक्ती डॉ. उमर मोहम्मद आहे की नाही याची पुष्टी होईल. गुप्तचर यंत्रणांना संशय आहे की डॉ. उमर मोहम्मद आय-२० कारमधील प्रवासी होता. या माणसाचा सीसीटीव्ही फोटो मिळाला आहे, ज्यामध्ये त्याने काळा मास्क घातला आहे. फरिदाबादमध्ये मोठ्या प्रमाणात अमोनियम नायट्रेट जप्त केल्याची माहिती मिळाल्यानंतर दिल्ली पोलिस आणि इतर एजन्सी डॉ. उमर मोहम्मद याचा शोध घेत होते.

Delhi Red Fort Blast: स्फोटावेळी दहशतवादी उमर मोहम्मद कारमध्ये होता

फरिदाबाद मॉड्यूलमधील दहशतवादी डॉ. उमर मोहम्मद फरार होता आणि एजन्सी त्याचा शोध घेत होत्या.एका हिंदी वृत्तसंस्थेने सूत्रांच्या हवाल्याने दिलेल्या माहितीनुसार, स्फोटावेळी दहशतवादी उमर मोहम्मद कारमध्ये होता. त्याने इतर दोन सहकारी दहशतवाद्यांसह हल्ल्याची योजना आखली होती. सूत्रांनी दिलेल्या माहितीनुसार, जेव्हा फरीदाबाद दहशतवादी मॉड्यूलमध्ये जलद अटक होऊ लागली, तेव्हा त्याला अटकेची भीती वाटू लागली आणि घाबरून त्याने दहशतवादी हल्ल्याची योजना आखली. त्याने त्याच्या साथीदारांसह कारमध्ये डिटोनेटर ठेवले आणि स्फोट घडवून आणला. सोमवारी दुपारी १ वाजता, हिंदी वृत्तसंस्थानी वृत्त दिले की जम्मू, काश्मीर पोलिस आणि फरिदाबाद पोलिस एका डॉक्टरचा शोध घेत आहेत.

दिल्ली पोलिस आणि तपास यंत्रणांना या आय-२० कारबद्दल महत्त्वाची माहिती मिळाली आहे. दिल्लीत आय-२० कार कुठून आली आणि ती लाल किल्ल्यावर कशी पोहोचली याबाबत संपूर्ण माहिती समोर आली आहे. दिल्ली पोलिसांच्या विशेष कक्षाने या कारच्या मार्गाचे सीसीटीव्ही मॅपिंग केले आहे. या अहवालानुसार, आय-२० कार शेवटची बदरपूर सीमेवर दिसली होती आणि नंतर बदरपूरहून दिल्लीत दाखल झाली. तिचा पुढील मार्ग निश्चित केला जात आहे. त्यानंतर ही कार लाल किल्ला मेट्रो स्टेशनच्या गेट क्रमांक १ जवळ दिसली.

Delhi Red Fort Blast: आय-२० कारचे जम्मू आणि काश्मीर कनेक्शन

लाल किल्ल्याजवळ झालेल्या स्फोटात वापरलेली आय-२० कार मोहम्मद सलमान नावाच्या व्यक्तीची होती. त्याने ती नदीमला विकली. नदीमने ती कार फरीदाबाद येथील रॉयल कार झोन या कार डीलरला विकली. त्यानंतर तारिकने ती खरेदी केली. त्यानंतर, ती उमरने घेतली होती. ही कार हरियाणातील गुरुग्राम उत्तर आरटीओमध्ये नोंदणीकृत होती. तिचा क्रमांक एचआर २६ ७६२४ होता आणि ती मोहम्मद सलमान नावाच्या व्यक्तीच्या नावावर नोंदणीकृत होती.

काल रात्री पुलवामातील सांबुरा येथे पोलिसांनी तारिकला ताब्यात घेतले, कारचा आरसी तारिकच्या नावावर नाही. सूत्रांकडून मिळालेल्या माहितीनुसार तारिकने २०१५ मध्ये उमरला कार दिली होती तोपर्यंत ही गाडी तारिकच्या नावावर होती. पोलिसांनी दोघांनाही ताब्यात घेतले आहे आणि त्यांची चौकशी सुरू आहे. या व्यवहारात आमिर नावाचा एक माणूस सहभागी असल्याचे निष्पन्न झाले आहे. जम्मू आणि काश्मीर पोलिस तारिक आणि आमिरची चौकशी करत आहेत.

दिल्ली पोलिसांनी स्फोटाची माहिती देताना सांगितले की, ज्या कारमध्ये स्फोट झाला त्या कारमध्ये तीन जण होते. हा आत्मघातकी हल्ला होता का याचा तपास करत असल्याचेही त्यांनी सांगितले. “हा स्फोट चालत्या हुंडई आय-२० कारमध्ये झाला, ज्यामध्ये तीन लोक बसले होते. आम्हाला जखमींच्या शरीरात कोणतेही श्रापनेल किंवा पंक्चर आढळले नाहीत, जे स्फोटात असामान्य आहे. आम्ही सर्व पैलूंची चौकशी करत आहोत,” असे एका वरिष्ठ पोलिस अधिकाऱ्याने सांगितले.

दिल्ली पोलिसांनी संध्याकाळी उशिरा कार मालक मोहम्मद सलमानला ताब्यात घेतले आणि त्याच्याकडून गाडीबद्दल चौकशी केली, असे एका पोलिस अधिकाऱ्याने सांगितले. सलमानने दीड वर्षांपूर्वी ओखला येथील देवेंद्र नावाच्या व्यक्तीला कार विकल्याचे त्यांनी सांगितले. नंतर ते वाहन अंबाला येथील एका व्यक्तीला आणि नंतर पुलवामा येथील तारिक नावाच्या व्यक्तीला विकण्यात आले. पोलिस त्या व्यक्तींची चौकशी करत आहेत.

दिल्ली पोलिसांनी या स्फोटाप्रकरणी एफआयआर नोंदवला आहे. दहशतवादी कृत्ये आणि त्यांच्या शिक्षेशी संबंधित कलम १६ आणि १८ अंतर्गत एफआयआर दाखल करण्यात आला आहे. स्फोटक पदार्थ कायद्याच्या कलम ३ आणि ४ देखील जोडण्यात आल्या आहेत. शिवाय, एफआयआरमध्ये खून आणि हत्येचा प्रयत्न करण्याचे कलम देखील समाविष्ट करण्यात आले आहेत.

Delhi Red Fort Blast: फरिदाबादचा लाल किल्ला स्फोटाशी काय संबंध

दिल्ली पोलिसांच्या विशेष कक्षातील सूत्रांनी दिलेल्या माहितीनुसार, आतापर्यंतच्या तपासातून असे दिसून आले आहे की लाल किल्ल्याजवळील कार बॉम्बस्फोटाचा संबंध फरिदाबाद दहशतवादी मॉड्यूलशी आहे. जम्मू आणि काश्मीर पोलिसांनी अलीकडेच या मॉड्यूलचा पर्दाफाश केला.

या दहशतवादी मॉड्यूलमध्ये सहभागी असलेले संशयित जैश-ए-मोहम्मद (जेईएम) आणि अन्सार गजवत-उल-हिंद (एजीयूएच) सारख्या बंदी घातलेल्या संघटनांशी संबंधित होते आणि त्यांच्या इशाऱ्यावर काम करत होते. या दहशतवादी मॉड्यूलमध्ये दोन पुरुष आणि एक महिला डॉक्टर देखील होते.

या प्रकरणी पोलिसांनी फरीदाबाद येथील डॉ. मुझम्मिल अहमद गनई आणि पुलवामा येथील डॉ. आदिल अहमद राथेर यांना अटक केली आहे. याशिवाय, पोलिसांनी लखनऊ येथील डॉ. शाहीन शाहिद यांनाही अटक केली आहे. या स्फोटासंदर्भात पोलिस दहशतवादी डॉ. मोहम्मद उमरचा शोध घेत होते. या कारवाईत पोलिसांनी सात आरोपींना अटक केली आहे आणि सुमारे २,९०० किलो स्फोटके, शस्त्रांचा साठा आणि अनेक आक्षेपार्ह वस्तू जप्त केल्या आहेत.

आणखी वाचा