(Munde’s resignation) मुंबई : खंडणी प्रकरणावरून बीडमधील मस्साजोगचे सरपंच संतोष देशमुख यांचे अपहरण करून त्यांची हत्या करण्यात आली होती. सीआयडीने न्यायालयात दाखल केलेल्या आरोपपत्रातील संतोष देशमुख यांना मारहाण केल्याचे काही फोटो समोर आले आहेत. ते व्हायरल झाल्यानंतर मुख्यमंत्री देवेंद्र फडणवीस यांनी कठोर भूमिका घेतली आणि त्यांनी राष्ट्रवादी काँग्रेसचे नेते धनंजय मुंडे यांना अन्न आणि नागरीपुरवठा मंत्रिपदाचा राजीनामा देण्याचे आदेश दिले. त्यानुसार आता धनंजय मुंडे लवकरच पदाचा राजीनामा देतील, अशी माहिती विश्वसनीय सूत्रांनी दिली.
मस्साजोग येथील सरपंच संतोष देशमुख हत्याप्रकरणावरून विरोधक आक्रमक झाले आहेत. यामध्ये परळी नगर परिषदेचे माजी नगराध्यक्ष वाल्मीक कराड याचाही कथित सहभाग असल्याचा आरोप आहे. वाल्मीक कराड हा मंत्री धनंजय मुंडे यांचा निकटवर्ती म्हणून ओळखला जातो. संतोष देशमुख हत्येप्रकरणी वाल्मीक कराडसह मुख्य आरोपी सुदर्शन घुले, सुधीर सांगळे, जयराम चाटे, विष्णू चाटे, प्रतीक घुले, महेश केदार यांना अटक करण्यात करून त्यांच्यावर मकोकाही लावण्यात आला.
याप्रकरणात नैतिक जबाबदारी म्हणून धनंजय मुंडे यांनी राजीनामा द्यावा, अश मागणी केवळ विरोधकच नव्हे तर, सत्ताधारी आमदारांकडूनही केली जात आहे. भाजपाचे आमदार सुरेश धस यांनीही हे प्रकरण लावून धरले आहे. देशमुख कुटुंबाला न्याय मिळवून देण्यासाठी माझा आटापीटा सुरू असल्याचे त्यांनी म्हटले आहे. राष्ट्रवादी काँग्रेसचे आमदार प्रकाश सोळंके यांनी थेट मुंडे यांच्या राजीनाम्यासाठी राज्यपालांची भेट घेतली होती. मात्र तरीही, त्यांच्याकडे राजीनामा मागण्यात आला नाही.
हेही वाचा – Manoj Jarange : “देशमुखांच्या हत्येचा बदला घेणार, धन्या मुंडेला…”; जरांगे-पाटलांची वॉर्निग
तथापि, संतोष देशमुख हत्याप्रकरणी सीआयडीने 1500 पानाचे आरोपपत्र दाखल केले असून यामध्ये आठ आरोपींची नावे आहेत. या आरोपपत्राला जोडलेले काही फोटो समोर आले आहेत, ज्यामुळे या आरोपींनी क्रौर्याची परिसीमा पार केल्याचे दिसते. एक आरोपी देशमुख यांना रॉडने मारहाण करताना दिसत आहे तर, दुसरा त्याचा व्हिडीओ बनवत आहे. एक आरोपी संतोष देशमुख यांच्या छातीवर पाय ठेवून उभा आहे. तर, एकाने संतोष देशमुख यांच्यावर लघुशंका केल्याचा संतापजनक फोटोही आहे.
हे संतापजनक फोटो सोशल मीडियावर व्हायरल झाल्यानतंर मुख्यमंत्री देवेंद्र फडणवीस, उपमुख्यमंत्री अजित पवार आणि राष्ट्रवादी प्रदेशाध्यक्ष सुनील तटकरे यांच्यात काल, सोमवारी रात्री देवगिरी बंगल्यावर बैठक झाली. त्यात धनंजय मुंडे यांनी पाचारण करण्यात आले आणि त्यांना राजीनामा देण्याचे आदेश मुख्यमंत्री फडणवीस यांची दिले. अजित पवार तसेच सुनील तटकरे यांनी मुंडे यांच्या राजीनाम्याबाबत सहमती दर्शविली, अशी माहिती सूत्रांनी दिली. त्यानुसार आता धनंजय मुंडे लवकरच राजीनामा देण्याची शक्यता आहे.
Comments are closed.