बबनराव, घर विकून पैसे दिले का? भाजपवाल्यांच्या डोक्यात सत्तेची मस्ती शिरली आहे – कैलास पाटील

“बबनराव, घर विकून पैसे दिले का? भाजपवाल्यांच्या डोक्यात सत्तेची मस्ती शिरली आहे”, असं म्हणत शिवसेना (उद्धव बाळासाहेब ठाकरे) पक्षाचे आमदार कैलास पाटील यांनी संताप व्यक्त केला आहे. भाजप नेते बबनराव लोणीकर यांनी शेतकऱ्यांबाबत बोलताना, तुझ्या अंगावरचे कपडे अन् पायातील चप्पल सरकारमुळेच, असं वादग्रस्त वक्तव्य केलं आहे. यावरच आपली प्रतिक्रिया देताना कैलास पाटील यांनी संताप व्यक्त केला आहे.

X वर एक पोस्ट करत कैलास पाटील म्हणाले आहेत की, “भाजपवाल्यांच्या डोक्यात सत्तेची मस्ती शिरली आहे. ज्या मायबाप जनतेच्या जीवावर तुम्ही मोठे झालात, ज्यांच्या मतावर तुम्ही सत्तेत बसलात. त्यांच्याविषयी कृतज्ञता बाळगायली हवी. मात्र त्यांचेच माय-बाप तुम्ही काढत सुटलात. याच जनतेने कर रुपाने भरलेला पैसा सरकार वेगवेगळ्या योजनांमधून तुटपुंज्या स्वरुपात देत आहे. तरीही प्रचंड उपकार केल्याचा आव आणून बेताल वक्तव्ये भाजपचे नेते करीत सुटले आहेत.”

कैलास पाटील म्हणाले, “बबनराव लोणीकर, कराच्या रुपाने जमा झालेल्या पैशावर जनतेचाच अधिकार आहे, तो त्यांच्याच हक्क आहे. मात्र तुम्ही जणू घर, शेत विकून स्वत:च्या खिशातील पैसे दिल्याचा आव आणताय. तुम्ही ज्यांच्या अंगावरच्या कपड्याच्या बाता मारताय, तीच जनता उद्या तुमच्या अंगावरचे कपडे अन् तुमचा माज उतरवल्याशिवाय राहणार नाही, हे लक्षात असू द्या.अशीच मस्तवाल भाषा करीत रहाल तर तुम्ही ज्यांची पायताने काढताय, तीच पायताने कशा पद्धतीने परत करायची, हेही या जनतेला चांगलेच ठाऊक आहे.”