मिंधेंचा रुसवा फुगवा कायम? पोलीस दलाच्या कार्यक्रमास मुख्यमंत्री फडणवीसांसह अजित पवारांची हजेरी, शिंदेंची मात्र दांडी

मुंबईत बुधवारी पोलीस दलाच्या एका कार्यक्रमाचे आयोजन करण्यात आले होते. या कार्यक्रमास मुख्यमंत्री देवेंद्र फडणवीस, उपमुख्यमंत्री अजित पवार या दोघांनी हजेरी लावली. मात्र उपमुख्यमंत्री एकनाथ शिंदे गैरहजर राहिल्याचे पाहायला मिळाले. विविध वृत्तवाहिन्यांनी यासंदर्भातील वृत्त प्रसिद्ध केले आहे. विशेष म्हणजे या कार्यक्रमाच्या निमंत्रण प्रत्रिकेत एकनाथ शिंदे यांच्या नावाचा उल्लेख आहे. मात्र तरी देखील एकनाथ शिंदे यांनी कार्यक्रमाला हजेरी न लावल्याने शिंदे गटाची नाराजी कायम असल्याच्या चर्चा राजकीय वतुर्ळात रंगल्या आहेत.

महायुतीमधील घटक पक्ष असणाऱ्या शिंदे गटाची भाजपकडून राजकीय आणि आर्थिक नाकाबंदी मागील काही दिवसांपासून सुरू आहे. स्थानिक स्वराज्य संस्थांच्या निवडणुकांच्या पार्श्वभूमीवर सुरू असलेल्या ऑपरेशन लोटसमुळे होत असलेल्या घुसमटीनंतर मिंध्यांच्या मंत्र्यांनी कॅबिनेटवर बहिष्कार टाकला आणि मंत्री प्रताप सरनाईक, गुलाबराव पाटील, भरत गोगावले, संजय शिरसाट यांनी मुख्यमंत्र्यांची भेट घेऊन भाजपकडून युतीचा धर्म पाळला जात नाही, असे सांगत आपल्यावर अन्याय होत असल्याचा आरोप केला. त्यावर मुख्यमंत्री फडणवीस यांनी उपमुख्यमंत्री एकनाथ शिंदे यांच्यासमोरच तुम्हीच उल्हासनगरमधून सुरुवात केली. तुम्ही केले ते चालते, आम्ही केले त्याला वाईट म्हणता! टाळी एका हाताने वाजत नाही, मर्यादा पाळा मग बघू, असे सांगत मिंध्यांच्या मंत्र्यांना उडवून लावले होते.

मिंध्यांच्या मंत्र्यांचा कॅबिनेटवर बहिष्कार; भाजपकडून राजकीय आणि आर्थिक नाकाबंदीमुळे घुसमट, फडणवीसांनी शिंदेंसमोरच मंत्र्यांना उडवून लावले

मिंधे गटाला भाजपने त्यांची जागा दाखवून दिल्याने मिंधे गटात प्रचंड नाराजी आहे. भाजपकडून सुरू असलेल्या ऑपरेशन लोटसमुळे एकनाथ शिंदे देखील अस्वस्थ असल्याची चर्चा राजकीय वर्तुळात सुरू आहे. त्यामुळेच आजच्या पोलीस दलाच्या कार्यक्रम पत्रिकेत नाव असून देखील शिंदे या कार्यक्रमास गैरहजर राहिले. मिंधे गटाकडून यावर अद्याप अधिकृत माहिती किंवा प्रतिक्रिया देण्यात आलेली नाही.