इंग्लंडचे माजी क्रिकेटपटू रॉबिन स्मिथ यांचे वयाच्या 62व्या वर्षी निधन झाले. 1988 ते 1996 या काळात स्मिथने इंग्लंडसाठी 62 कसोटी सामने आणि 71 एकदिवसीय सामने खेळले. 1992च्या विश्वचषकात तो उपविजेत्या संघाचा (इंग्लंड) भाग होता. त्याच्या कुटुंबाने त्याच्या निधनाची पुष्टी केली. या दुःखद बातमीने क्रिकेट जगतात शोककळा पसरली आहे.
रॉबिन स्मिथच्या कारकिर्दीबद्दल बोलायचे झाले तर, त्याने इंग्लंडसाठी 62 कसोटी सामने खेळले. या काळात त्याने 43.67 च्या सरासरीने 4236 धावा केल्या, ज्यात नऊ शतके होती, त्यापैकी तीन शतके वेस्ट इंडिजविरुद्ध होती. त्याची सर्वोच्च कसोटी धावसंख्या 175 होती, जी त्याने 1994 मध्ये वेस्ट इंडिजविरुद्ध केली. स्मिथने हॅम्पशायरचे प्रतिनिधित्व करताना काउंटी क्रिकेट देखील खेळले. 2004 मध्ये स्मिथने सर्व प्रकारच्या क्रिकेटमधून निवृत्ती घेतली आणि तेव्हापासून त्याचे मानसिक आरोग्य बिघडत चालले होते.
स्मिथने 1993 मध्ये ऑस्ट्रेलियाविरुद्ध ऐतिहासिक खेळी केली. त्याने नाबाद 167 धावा केल्या, जो या फॉरमॅटमध्ये इंग्लंडच्या फलंदाजाने केलेली सर्वोच्च वैयक्तिक धावसंख्या होती. स्मिथचा हा विक्रम 23 वर्षे टिकला. 2016 मध्ये, अॅलेक्स हेल्सने पाकिस्तानविरुद्ध 171 धावा करून हा विक्रम मोडला. एकदिवसीय क्रिकेटमध्ये, त्याने 71 सामन्यांमध्ये 70 डावांमध्ये 39.01च्या सरासरीने 2419 धावा केल्या.
रॉबिन स्मिथच्या कुटुंबाने जारी केलेल्या निवेदनात सोमवारी दक्षिण पर्थ येथील त्याच्या अपार्टमेंटमध्ये स्मिथचे निधन झाल्याची पुष्टी केली आहे. इंग्लंड आणि वेल्स क्रिकेट बोर्डाचे (ईसीबी) अध्यक्ष रिचर्ड थॉम्पसन यांनी स्मिथच्या निधनाबद्दल शोक व्यक्त केला. हॅम्पशायर क्रिकेट क्लबनेही स्मिथला श्रद्धांजली वाहिली. थॉम्पसन म्हणाले की रॉबिन स्मिथ हा असा खेळाडू होता जो जगातील काही वेगवान गोलंदाजांसोबत बरोबरी राखत होता आणि आव्हानात्मक दृष्टिकोनाने आक्रमक वेगवान गोलंदाजीचा सामना करत होता.
Comments are closed.