टी-२० वर्ल्ड कप २०२६ चा २३ वा लीग सामना इंग्लंड आणि स्कॉटलंड दरम्यान कोलकाता येथील ईडन गार्डन्सवर खेळला गेला. या सामन्यात इंग्लंडने इतिहास रचत स्कॉटलंडचा ५ गडी राखून पराभव केला. या विजयासह इंग्लंडने मोठा उलटफेर टाळला आणि पहिल्यांदाच एखाद्या युरोपियन संघाला पराभूत केले. इंग्लंडच्या या विजयात टॉम बँटनने ६३ धावांची सर्वात मोठी खेळी साकारली.
विशेष म्हणजे, टी-२० आंतरराष्ट्रीय क्रिकेटमध्ये इंग्लंड आणि स्कॉटलंडचे संघ आमनेसामने येण्याची ही केवळ दुसरीच वेळ होती. यापूर्वी २०२४ च्या टी-२० वर्ल्ड कपमध्येही दोन्ही संघ भिडणार होते, परंतु पावसामुळे तो सामना रद्द झाला होता. अशा प्रकारे, इंग्लंडने पहिल्यांदाच स्कॉटलंडचा पराभव केला आहे.
या सामन्यात इंग्लंडने नाणेफेक जिंकून प्रथम गोलंदाजी करण्याचा निर्णय घेतला. प्रथम फलंदाजीसाठी उतरलेला स्कॉटलंडचा संघ १९.४ षटकांत १५२ धावांवर सर्वबाद झाला. संघासाठी कर्णधार रिची बेरिंग्टनने सर्वाधिक ४९ धावांची खेळी केली. तर इंग्लंडकडून फिरकीपटू आदिल रशीदने सर्वाधिक ३ बळी टिपले.
धावांचा पाठलाग करण्यासाठी मैदानात उतरलेल्या इंग्लंडच्या संघाने १८.२ षटकांत ५ गडी राखून विजय मिळवला. संघासाठी महत्त्वपूर्ण खेळी करणाऱ्या टॉम बँटनला ‘प्लेअर ऑफ द मॅच’ पुरस्काराने गौरवण्यात आले. स्कॉटलंडकडून ब्रँडन मॅकमुलन, ब्रॅड करी, ब्रॅड व्हील, मायकेल लीस्क आणि ऑलिव्हर डेव्हिडसन यांनी प्रत्येकी १ बळी घेतला.
यापूर्वी इंग्लंडने नेदरलँड्सविरुद्ध दोन टी-२० सामने खेळले होते आणि त्या दोन्ही सामन्यांत नेदरलँड्सने इंग्लंडचा पराभव केला होता. याशिवाय आयर्लंडविरुद्धही इंग्लंडचे दोन सामने झाले होते, ज्यामध्ये एका सामन्यात इंग्लंडचा पराभव झाला, तर दुसरा सामना पावसामुळे रद्द झाला होता. आता स्कॉटलंडला हरवून इंग्लंडने युरोपियन देशांविरुद्धच्या पराभवाचे सत्र अखेर संपवले आहे.
Comments are closed.