जम्मू-काश्मीरमधील पहलगाम येथे 22 एप्रिल 2025 रोजी झालेल्या दहशतवादी हल्ल्याची आंतरराष्ट्रीय स्तरावरील दहशतवादी अर्थपुरवठ्यावर नजर ठेवणारी संस्था फायनान्शियल अॅक्शन टास्क फोर्सने (FATF) कठोर शब्दांत निंदा केली आहे. या हल्ल्यामागे दहशतवाद्यांना मिळणारे आर्थिक पाठबळ हा प्रमुख मुद्दा असल्याचे एफएटीएफने स्पष्ट केले आहे. संस्थेने म्हटले आहे की, असे क्रूर हल्ले दहशतवादी नेटवर्कमधील टेरर फंडिंगशिवाय शक्य होऊ शकत नाहीत.
‘दहशतवाद्यांना आर्थिक पाठबळ बंद करा’
एफएटीएफने आपल्या निवेदनात म्हटले आहे की, पहलगाम हल्ल्यासारख्या घटनांमागे एक सुसंघटित आणि खोलवर रुजलेले आर्थिक नेटवर्क कार्यरत आहे, जे जगभरात दहशतवादाचा प्रसार करण्यासाठी पैशांचा वापर करते. जोपर्यंत दहशतवादाला आर्थिक पुरवठा होत राहील, तोपर्यंत दहशतवादी कारवाया थांबणार नाहीत,” असे एफएटीएफने सांगितले.
या हल्ल्यांना आळा घालण्यासाठी दहशतवादी अर्थपुरवठा रोखण्याच्या उपाययोजनांवर लक्ष केंद्रित करण्याची गरज असल्याचे संस्थेने म्हटले आहे. एफएटीएफच्या अध्यक्षा एलिसा दे अंदा माद्राजो म्हणाल्या आहेत की, “दहशतवाद्यांना फक्त एकदा यशस्वी होण्याची गरज असते, पण आपल्याला प्रत्येक वेळी त्यांना रोखण्यासाठी यशस्वी व्हावे लागते.” त्यांनी दहशतवादी अर्थपुरवठ्याचा सामना करण्यासाठी जागतिक समुदायाला एकत्र येण्याचे आवाहन केले.
Comments are closed.