आशिया कप ट्रॉफीचा वाद सध्या चांगलाच चर्चेचा विषय ठरला आहे. टीम इंडियाने आशिया कप जिंकूनही अजूनपर्यंत ट्रॉफी हातात घेतलेली नाही. ऑस्ट्रेलियाविरुद्ध टी20 मालिका जिंकल्यानंतर कर्णधार सूर्यकुमार यादवने पीसीबी प्रमुख मोहसिन नकवी यांच्यावर अप्रत्यक्ष टोला लगावला. माहितीनुसार, मोहसिन नकवी आशिया कपची ट्रॉफी स्वतःसोबत घेऊन गेले होते आणि अजून ती टीम इंडियाकडे परत आलेली नाही. सूर्यानं विनोदी पद्धतीने सांगितलं की, ऑस्ट्रेलियाविरुद्ध मालिकेनंतर शेवटी ट्रॉफीला हात लावून बरं वाटलं. अशा शब्दांत त्याने नकवींच्या ट्रॉफी “चोरी”वर हलक्याफुलक्या अंदाजात चिमटा काढला.
ऑस्ट्रेलियाविरुद्धच्या मालिकेत विजय मिळवल्यानंतर सूर्यकुमार यादव आणि टीम इंडियाला ट्रॉफी मिळाली. पत्रकार परिषदेत सूर्यानं या गोष्टीचा उल्लेख करत नकवींची खिल्ली उडवली आणि म्हणाला, “शेवटी ट्रॉफीला हात लावून बरं वाटलं. मालिकेच्या विजयानंतर जेव्हा माझ्या हातात ट्रॉफी आली, तेव्हा खूप छान वाटलं. काही दिवसांपूर्वी महिला संघाची वर्ल्ड कप ट्रॉफीही भारतात आली होती. ती ट्रॉफी हातात घेतानाही असंच समाधान वाटलं.”
बीसीसीआयचे सचिव देवजीत सैकिया यांनी आयसीसीच्या बैठकीत मोहसिन नकवी यांची भेट घेतली आणि लवकरच टीम इंडियाला एशिया कपची ट्रॉफी मिळणार असल्याचा दावा केला. त्यांनी सांगितले, “मी आयसीसीच्या मीटिंगचा भाग होतो आणि पीसीबी चेअरमन मोहसिन नकवीही तिथे उपस्थित होते. आयसीसीने माझी आणि पीसीबी प्रमुखांची स्वतंत्र बैठक आयोजित केली होती, ज्यामध्ये आयसीसीचे काही वरिष्ठ अधिकारीही उपस्थित होते.”
सैकिया यांनी पुढे सांगितले की, भारताला लवकरच ट्रॉफी मिळणार आहे. मोहसिन नकवी यांनी आधीच सांगितले होते की ते ट्रॉफी देण्यासाठी तयार आहेत, पण त्यांना अशी एक समारंभपूर्वक सोहळा हवा आहे जिथे टीम इंडियाचा कर्णधार स्वतः येऊन ट्रॉफी स्वीकारेल. आता पाहावे लागेल की या ट्रॉफी विवादाचा शेवट काय होतो.
Comments are closed.