शुबमन गिल वनडे कर्णधार बनल्यानंतर गौतम गंभीरच्या घरी पार्टी, कोण-कोण असेल सहभागी?

भारतीय क्रिकेट संघाच्या ऑस्ट्रेलिया दौऱ्यासाठी निवडलेल्या वनडे संघाबाबत सध्या जोरदार चर्चा सुरू आहेत. शुबमन गिलला रोहित शर्मा याऐवजी वनडे संघाचे कर्णधार बनवण्यात आले आहे. संघ निवड समितीने मुख्य प्रशिक्षक गौतम गंभीर यांच्यासह हा निर्णय घेतला. आता बातमी अशी आहे की संघ निवडीनंतर गंभीर यांच्या घरी टीम इंडियासाठी डिनर आयोजित करण्यात आला आहे. मात्र, या डिनरचा संघ निवडीशी काहीही संबंध नाही, कारण भारतीय संघ वेस्ट इंडिजविरुद्ध दिल्लीत होणाऱ्या कसोटी सामन्यापूर्वी सर्व सदस्यांना गंभीरच्या घरी जेवायला बोलावले गेले आहे.

भारतीय संघाचा मुख्य प्रशिक्षक गौतम गंभीरने दुसऱ्या कसोटी सामन्यापूर्वी शुबमन गिलच्या नेतृत्वाखालील संघाला आपल्या घरी डिनरसाठी आमंत्रित केले आहे. हा डिनर 10 ते 15 ऑक्टोबर दरम्यान नवी दिल्लीतील अरुण जेटली स्टेडियममध्ये होणाऱ्या दुसऱ्या कसोटी सामन्यापूर्वी होईल. मिळालेल्या माहितीनुसार, सर्व संघ सदस्यांना या डिनरसाठी आमंत्रित केले गेले आहे.

माहितीनुसार, 8 ऑक्टोबर रोजी अरुण जेटली स्टेडियममध्ये होणाऱ्या ट्रेनिंग सेशन नंतर संपूर्ण संघ गंभीरच्या घरी डिनरसाठी जाईल.

भारत आणि वेस्ट इंडिज यांच्यातील दुसरा कसोटी सामना 10 ते 15 ऑक्टोबर दरम्यान नवी दिल्लीतील अरुण जेटली स्टेडियममध्ये होणार आहे. शुबमन गिलच्या नेतृत्वाखालील संघ आत्मविश्वासाने भरलेला असेल, कारण संघाने अहमदाबादच्या नरेंद्र मोदी स्टेडियममध्ये पहिल्या सामन्यात वेस्ट इंडिजला मोठ्या फरकाने पराभूत केले.

भारताने वेस्ट इंडिजविरुद्ध एक डाव आणि 140 धावांनी विजय मिळवत दोन सामन्यांच्या मालिकेत 1-0 अशी आघाडी घेतली. रवींद्र जडेजाने शानदार कामगिरी करत नाबाद 104 धावा केल्या आणि चार विकेट घेतले. वेस्ट इंडिजला पहिल्या डावात 162 धावांवर मर्यादित केले, त्यानंतर भारताने 5 विकेट गमावून 448 धावा करत डाव घोषित केला. केएल राहुल, ध्रुव जुरेल आणि जडेजा यांनी शतकं मारली. दुसऱ्या डावात पाहुणा संघ 146 धावांवरच आटोक्यात आला. मोहम्मद सिराजने सामन्यात 8 विकेट घेतल्या तर जसप्रीत बुमराह, जडेजा आणि कुलदीप यादव यांनी त्याला जबरदस्त साथ दिली.