केकेआरला खुशखबर मिळणार, पण लखनौच्या फिरकीपटूमुळे एलएसजीचं टेन्शन वाढणार!

IPL 2026 दरम्यान एकीकडे लखनऊ सुपर जायंट्सला (LSG) आपल्या स्टार फिरकीपटूची प्रतीक्षा आहे, तर दुसरीकडे कोलकाता नाईट रायडर्ससाठी (KKR) दिलासादायक बातमी समोर येत आहे. श्रीलंकेचा दिग्गज लेग-स्पिनर वानिंदू हसरंगा याच्या उपलब्धतेबाबत अद्याप साशंकता आहे, तर वेगवान गोलंदाज मथीशा पथिराना लवकरच पुनरागमन करण्याचे संकेत मिळत आहेत. लखनऊने हसरंगाला २ कोटी रुपयांच्या बेस प्राईसवर खरेदी केले होते, पण त्याने अद्याप संघात सहभाग घेतलेला नाही. सर्वात मोठी चिंतेची बाब म्हणजे त्याने आपल्या पुनरागमनाबाबत कोणतीही स्पष्ट माहिती दिलेली नाही. त्यामुळे आता फ्रँचायझी त्याच्या पर्यायाचा विचार करू शकते.

​’क्रिकबझ’च्या सूत्रांनुसार, हसरंगाने अद्याप श्रीलंका क्रिकेटची अनिवार्य फिटनेस टेस्ट दिलेली नाही, जी IPL खेळण्यासाठी लागणाऱ्या NOC (ना हरकत प्रमाणपत्र) साठी आवश्यक असते. नुकतेच कोलंबोच्या आर. प्रेमदासा स्टेडियमवर त्याने फलंदाजीचा सराव केला, पण गोलंदाजी केली नाही. हसरंगा गेल्या दोन महिन्यांपासून मैदानाबाहेर आहे. डाव्या हॅमस्ट्रिंगच्या दुखापतीमुळे ८ फेब्रुवारीला आयर्लंडविरुद्ध झालेल्या टी-२० वर्ल्ड कप सामन्यानंतर तो एकही सामना खेळलेला नाही.

​हसरंगाची IPL कारकीर्द चढ-उतारांची राहिली आहे. अनेक फ्रँचायझींचे असे मत आहे की, काही परदेशी खेळाडू बेस प्राईसवर विकले गेल्यानंतर स्पर्धेत सहभागी होत नाहीत. याच कारणामुळे IPL ने २०२४ मध्ये नियम लागू केले होते, ज्यानुसार लिलावानंतर नाव मागे घेणाऱ्या खेळाडूंवर कारवाई होऊ शकते. लखनऊ टीमशी संबंधित एका सूत्राने सांगितले की, आम्हाला वानिंदू हसरंगाबाबत कोणतीही ठोस माहिती मिळालेली नाही. अशा परिस्थितीत टीम रिप्लेसमेंटचा (पर्यायी खेळाडूचा) शोध घेऊ शकते. लखनऊकडे मुजीब उर रहमान, मोहम्मद नबी, लियाम डॉसन आणि रेहान अहमद यांसारखे अनेक परदेशी फिरकीपटू पर्याय म्हणून उपलब्ध आहेत.

​दुसरीकडे, KKR साठी आनंदाची बातमी ही आहे की पथिराना वेगाने बरा होत आहे. फ्रँचायझीने त्याला १८ कोटी रुपयांना खरेदी केले असून, तो या सीझनमध्ये लवकरच उपलब्ध होईल अशी आशा आहे. पथिरानाने नेटमध्ये गोलंदाजी सुरू केली असून नुकतेच त्याला प्रेमदासा स्टेडियमवर सराव करताना पाहिले गेले. सध्या तो पूर्ण वेगाने गोलंदाजी करत नसला तरी त्याच्या पुनरागमनाचा मार्ग मोकळा होताना दिसत आहे. जिथे लखनऊ हसरंगाच्या अनिश्चिततेमुळे त्रस्त आहे, तिथे कोलकाता नाईट रायडर्सला पथिरानाच्या येण्याने बळ मिळण्याची शक्यता आहे. येणाऱ्या दिवसांत हे अपडेट्स दोन्ही संघांसाठी अत्यंत महत्त्वाचे ठरू शकतात.