टीम इंडियासाठी आनंदाची बातमी…!!! आशिया चषकासाठी संघ जाहीर होण्यापूर्वीच 'हा' स्टार खेळाडू फिटनेस टेस्ट पास

सूर्यकुमार यादव: भारतीय क्रिकेट संघ आणि त्यांच्या चाहत्यांसाठी एक चांगली बातमी समोर आली आहे. भारतीय संघाचा टी20 कर्णधार सूर्यकुमार यादवने फिटनेस चाचणी पास केली आहे. तो 2025च्या आशिया चषकासाठी पूर्णपणे तयार आहे. काही काळापूर्वी सूर्याने स्पोर्ट्स हर्नियाची शस्त्रक्रिया केली होती आणि तेव्हापासून तो पुनर्वसनाखाली होता. (Suryakumar Yadav fitness test)

भारताची आशिया चषकासाठी निवड करण्याआधी, अजित अगरकर यांच्या नेतृत्वाखालील निवड समितीच्या बैठकीपूर्वी, टी20 संघाचा कर्णधार सूर्यकुमार यादवने बंगळुरू येथील ‘बीसीसीआय सेंटर ऑफ एक्सलन्स’ येथे आपली फिटनेस चाचणी पास केली. सूर्यकुमार शेवटचा आयपीएलमध्ये खेळला होता आणि ‘प्लेअर ऑफ द सिरीज’ ठरला होता. या आक्रमक फलंदाजाने जूनमध्ये जर्मनीच्या म्युनिक शहरात पोटाच्या खालच्या उजव्या बाजूच्या ‘स्पोर्ट्स हर्निया’ची शस्त्रक्रिया केली होती. (Suryakumar Yadav surgery update)

बीसीसीआयच्या एका सूत्राने पीटीआय वृत्तसंस्थेला सांगितले, “शस्त्रक्रियेनंतर पुन्हा मैदानात परतण्याआधी फिटनेस चाचणी अनिवार्य असते. सूर्यकुमारने ही चाचणी पास केली आहे.” सूर्यकुमारने शस्त्रक्रियेनंतर इंस्टाग्रामवर पोस्ट केले होते, “पोटाच्या खालच्या उजव्या बाजूच्या स्पोर्ट्स हर्नियाची शस्त्रक्रिया झाली. मला हे सांगताना आनंद होत आहे की शस्त्रक्रियेनंतर मी आधीच बरा होत आहे. मैदानात परत येण्याची आतुरतेने वाट पाहत आहे.” (Suryakumar Yadav Statement)

2025चा आशिया चषक 9 सप्टेंबरपासून सुरू होईल आणि त्याचा फायनल सामना 28 सप्टेंबरला खेळला जाईल. या वेळी आशिया चषकात एकूण 8 संघ सहभागी होतील, ज्यांना 2 गटांमध्ये विभागले गेले आहे. 2025च्या आशिया चषकाचे सामने अबू धाबी आणि दुबईमध्ये खेळले जातील. भारतीय संघ आपला पहिला सामना 10 सप्टेंबरला खेळेल.

2025च्या आशिया चषकात भारत आणि पाकिस्तान यांच्यातील सामना 14 सप्टेंबरला होईल, जो लीग स्टेजचा सामना असेल. दोन्ही संघ 21 सप्टेंबरला सुपर-4 फेरीत पुन्हा भिडू शकतात. यानंतर, जर भारत आणि पाकिस्तान दोन्ही संघ फायनल फेरीत पोहोचले, तर त्यांच्यात पुन्हा एकदा सामना होईल. अशा प्रकारे, 2025च्या आशिया चषकात भारत आणि पाकिस्तान यांच्यात एकूण 3 सामने खेळले जाऊ शकतात.