मॅंचेस्टर कसोटीनंतर इंग्लंडचा कर्णधार बेन स्टोक्सवर इंग्लंडचे माजी कर्णधार नासिर हुसेन यांनी कडक शब्दांत टीका केली आहे. चौथ्या कसोटी सामन्यात अखेरच्या तासात स्टोक्सने सामना लवकर संपवण्याचा प्रस्ताव मांडला होता, परंतु भारताचे रवींद्र जडेजा आणि वॉशिंग्टन सुंदर यांनी तो नाकारत आपली फलंदाजी सुरू ठेवली. या निर्णयानंतर स्टोक्सने हॅरी ब्रुकला गोलंदाजीस आणले, ज्याला हुसेन यांनी ‘नासमजदारी’ म्हटले.
हुसेन म्हणाले, “जडेजा आणि सुंदर यांनी आपल्या डावाची योग्य मेहनत घेतली. ते 80 आणि 90 धावांवर होते व शतक करण्याचा त्यांना पूर्ण अधिकार होता. इंग्लंडला त्यावेळी त्रास वाटत होता कारण त्यांचे गोलंदाज थकले होते, परंतु त्यामुळे खेळ थांबवणे योग्य नव्हते. स्टोक्सने शेवटी ब्रुककडून गोलंदाजी करून स्वतःला नासमज दाखवले.”
त्यांनी पुढे सांगितले की, “आपण या गोष्टींना जास्त महत्त्व देतो. प्रत्यक्षात भारताने शानदार खेळ केला आणि याचे संपूर्ण श्रेय त्यांनाच द्यायला हवे.”
वॉशिंग्टन सुंदरला चेतेश्वर पुजाराने जेव्हा याबाबत विचारले, तेव्हा त्याने हसत विषय टाळला आणि म्हटले, “सर्वांनी टीव्हीवर पाहिले काय झाले, आणि सर्वांनी त्याचा आनंद घेतला असेल.”
भारताचे माजी फलंदाज संजय मांजरेकर यांनीदेखील भारतीय फलंदाजांच्या भूमिकेला पाठिंबा दिला. ते म्हणाले, “खेळाडूंना त्यांच्या पद्धतीने फलंदाजी करण्याचा पूर्ण अधिकार आहे. मला वाटते स्टोक्स शेवटी एखाद्या बिगडेल मुलासारखे वागले. जर इंग्लंडचे दोन फलंदाज शतकाच्या जवळ असते, तर त्यांनी सामना सोडून दिला असता का?”
या सर्व घडामोडींमुळे मॅंचेस्टर कसोटीत तणावाचे वातावरण निर्माण झाले, परंतु भारतीय खेळाडूंनी आपला खेळ प्रामाणिकपणे पूर्ण करून चाहत्यांची मने जिंकली.
Comments are closed.