छत्रपती शिवाजी महाराज, संभाजी महाराज व ताराराणी यांचा अपमान केल्याचा आरोप असलेल्या प्रशांत कोरटकरच्या अडचणी वाढल्या आहेत. त्याची अटक थांबवण्यास उच्च न्यायालयाने शुक्रवारी स्पष्ट नकार दिला.
कोल्हापूर न्यायालयाने अटकपूर्व जामीन फेटाळल्यानंतर कोरटकरने यासाठी हायकोर्टाचे दार ठोठावले. न्या. राजेश पाटील यांच्या एकल पीठासमोर यावर सुनावणी झाली. अटकपूर्व जामीन याचिकेची प्रत आम्हाला मिळाली नसल्याचे अतिरिक्त सरकारी वकील अजय पाटील यांनी न्यायालयाच्या निदर्शनास आणले. याचिकेची प्रत सरकारी पक्षाला द्या, असे आदेश न्यायालयाने कोरटकरच्या वकिलाला दिले व ही सुनावणी सोमवार, 24 मार्च 2025 पर्यंत तहकूब केली.
पुढील सुनावणीपर्यंत अटकेपासून संरक्षण द्यावे, अशी विनंती कोरकटकरचे वकील सौरभ घाग यांनी केली. संपूर्ण प्रकरण ऐकल्याशिवाय अटक थांबवण्याचे अंतरिम आदेश देता येणार नाहीत, असे न्या. पाटील यांनी स्पष्ट केले. किमान तोंडी तरी असे आदेश पोलिसांना द्यावेत, अशी विनवणी अॅड. घाग यांनी केली. त्यासही न्यायालयाने नकार दिला.
Comments are closed.