बांगलादेशचा ऐतिहासिक पराक्रम! आयसीसी क्रमवारीत थेट सहावं स्थान पटकावत पाकिस्तान-श्रीलंकेला टाकलं मागे

बांगलादेशचा संघ ऑस्ट्रेलियाविरुद्ध दुसरा कसोटी सामना एक डाव आणि 51 धावांनी पराभूत झाला आहे. जरी असं असलं तरी, आयसीसी (ICC) कसोटी संघ क्रमवारीत बांगलादेशने इतिहास रचला आहे. आयसीसीच्या कसोटी क्रमवारीत बांगलादेशने तीन स्थानांची झेप घेत ऐतिहासिक सहावा क्रमांक पटकावला आहे.

बांगलादेशला आयसीसी क्रमवारीत हा फायदा ऑस्ट्रेलियाविरुद्धच्या पहिल्या कसोटीत मिळालेल्या विजयामुळे झाला आहे. बांगलादेशने पहिल्या कसोटीत ऑस्ट्रेलियाचा 9 गडी राखून पराभव केला होता. विशेष म्हणजे, बांगलादेशचा संघ पहिल्यांदाच आयसीसी कसोटी क्रमवारीत 9 व्या स्थानावरून पुढे आला आहे. आता बांगलादेश संघ सहाव्या क्रमांकावर पोहोचला असून त्यांनी पाकिस्तान आणि श्रीलंका (Pakistan & Srilanka) यांसारख्या मोठ्या संघांना मागे टाकले आहे. बांगलादेशचा कसोटी कर्णधार नजमुल हुसेन शांतोसाठी ही एक मोठी उपलब्धी मानले जात आहे.

ऑस्ट्रेलियाविरुद्ध दुसरा कसोटी सामना एक डाव आणि 51 धावांनी हारल्यानंतर शांतो म्हणाला, नक्कीच (सहाव्या क्रमांकावर पोहोचणे) ही चांगली बाब आहे. मला याबद्दल नुकतीच माहिती मिळाली. कसोटी क्रमवारीत सहाव्या क्रमांकावर पोहोचणे ही खूप मोठी उपलब्धी आहे. जर आपण या कसोटी सामन्यात आणखी चांगला खेळ करू शकलो असतो, तर ते अधिक बरे झाले असते.

बांगलादेशचा संघ आता वेस्ट इंडिज, पाकिस्तान आणि श्रीलंका यांना मागे टाकत सहाव्या क्रमांकावर पोहोचला आहे. शांतोने अशी मागणी केली आहे की, बांगलादेशला ऑस्ट्रेलियामध्ये आणखी कसोटी सामने खेळण्याची संधी मिळावी. तो म्हणाला, आम्ही 23 वर्षांनंतर येथे आलो आहोत (2003 नंतर ऑस्ट्रेलियातील पहिली कसोटी मालिका). अशा संघाविरुद्ध आणि अशा वातावरणात मुकाबला करणे सोपे नसते. जर आपण सातत्याने येथे येऊ शकलो, तर खेळाडूंना येथील परिस्थितीचा अंदाज येईल. त्यांना ऑस्ट्रेलियात खेळण्याचा आणखी अनुभव मिळेल. ते येथील परिस्थितीनुसार स्वतःला जुळवून घेऊ शकतील आणि उत्तम क्रिकेट खेळू शकतील.