हायपरसोनिक ग्लाइड क्षेपणास्त्र लवकरच उपलब्ध होईल

डीआरडीओकडून होतेय निर्मिती : ध्वनि असे देण्यात आले नाव : सैन्यक्षमतेत पडणार मोठी भर

वृत्तसंस्था/ नवी दिल्ली

ऑपरेशन सिंदूरदरम्यान जगाने भारताच्या क्षेपणास्त्र तंत्रज्ञानाची कमाल पाहिली. भारताने स्वत:च्या क्षेपणास्त्रांचा मारा सुरू करताच पाकिस्तानने शरणागती पत्करली होती. भारताच्या या शक्तीत आता आणखी वाढ होणार आहे. भारत लवकरच हायपरसोनिक ग्लाइड व्हीकल (एचजीव्ही) तयार करणार आहे. भारताचे प्रयत्न आता अखेरच्या टप्प्यात पोहोचले आहेत. या एचजीव्ही क्षेपणास्त्राला एस-500, एस-400 किंवा आयर्न डोमसारखी हवाई सुरक्षा यंत्रणाही ट्रॅक करू शकणार नाही.

डीआरडीओ असे हायपरसोनिक ग्लाइड व्हीकल विकसित करत आहे, ज्याच्या मदतीने 60 किलोमीटरच्या उंचीवरून (वायुमंडळाचा वरील हिस्सा) अत्याधिक वेगवान क्षेपणास्त्र डागता येऊ शकतील. ही क्षेपणास्त्र प्रणाली पारंपरिकसोबत आण्विक वॉरहेड वाहून नेण्यास सक्षम असेल की नाही, हे डीआरडीओने अद्याप स्पष्ट केलेले नाही. याला ध्वनि हायपरसोनिक ग्लाइड व्हीकल नाव देण्यात आले आहे.

ही प्रणाली अल्ट्रा एज मॉडर्न तंत्रज्ञानावर आधारित आहे. भारताकडे ब्राह्मोससोबत अग्नि श्रेणीची अनेक क्षेपणास्त्रs असून त्यांचा मारक पल्लाही वेगवेगळा आहे. यात अग्नि-5 आंतरखंडीय बॅलेस्टिक क्षेपणास्त्र सामील असून याचा मारक पल्ला 5800 किलोमीटरपेक्षा अधिक आहे.  आता एचजीव्ही प्रकल्पाच्या अंतर्गत भारत विध्वंसक क्षेपणास्त्रांच्या ताफ्यात आणखी एक मैलाचा दगड सामील करण्याच्या तयारीत आहे.

उच्च तापमान सहनकरण्याची क्षमता

डीआरडीओने एचजीव्हीला उच्च तापमान सहन करण्यास सक्षम असेल अशाप्रकारे डिझाइन केले आहे. हायपरसोनिक ग्लाइड व्हीकल 2000 ते 3000 अंश तापमान सहन करण्यास सक्षम असल्याचे सांगण्यात येत आहे. याचा अर्थ अत्याधिक तापमानातही हे व्हीकल वितळणार नाही. यामुळे याची क्षमता आणखी वाढते. 60 किलोमीटरच्या उंचीवरून याच्या माध्यमातून हायपरसोनिक क्षेपणास्त्र डागले जाऊ शकते. या प्रणालीमुळे शत्रूवर अचूक निशाणा साधत त्याला क्षणार्धात नष्ट केले जाऊ शकते.

हवाई सुरक्षा प्रणालींना चकवा

ध्वनि हायपरसोनिक ग्लाइड व्हीकल हे हवाई सुरक्षा प्रणालींना चकवा देण्यास सक्षम आहे. या सिस्टीमद्वारे डागण्यात आलेले क्षेपणास्त्र स्वत:ची दिशाही बदलू शकते. हायपरसोनिक वेग आणि मध्येच दिशा बदलता येत असल्याने या क्षेपणास्त्राला एस-400, एस-500 किंवा मग आयर्न डोम सारख्या हवाई सुरक्षाप्रणालीही ट्रॅक करू शकत नाही. डीआरडीओकडून ही प्रणाली 2029-30 पर्यंत सशस्त्र दलांना मोहिमात्मक वापरासाठी सोपविली जाऊ शकते. या क्षेपणास्त्राचा मारक पल्ला आयसीबीएमच्या धर्तीवर असू शकतो.