रशिया युद्धविरामासाठी तयार, पण पुतीन यांनी ठेवल्या 4 अटी; युक्रेन झुकणार की महासत्ता अमेरिका एक पाऊल मागे घेणार?

रशिया आणि युक्रेनमध्ये गेल्या तीन वर्षापासून युद्ध सुरू आहे. या युद्धामध्ये आजतागायत शेकडो जवानांसह सामान्य नागरिकांचाही मृत्यू झाला आहे. तसेच वित्तहानीही मोठ्या प्रमाणात झाली आहे. हे युद्ध थांबवण्यासाठी जागतिक स्तरावर प्रयत्न सुरू असून अमेरिकेची सूत्र दुसऱ्यांदा हाती घेतल्यानंतर राष्ट्राध्यक्ष डोनाल्ड ट्रम्प यांनी यात जातीने लक्ष घातले आहे. नुकतीच सौदी अरेबियामध्ये अमेरिका आणि युक्रेनच्या अधिकाऱ्यांची एक महत्त्वपूर्ण बैठक पार पडली होती. या बैठकीमध्ये अमेरिकने 30 दिवसांच्या युद्धविरामाचा प्रस्ताव सादर केला आणि युक्रेनचे राष्ट्राध्यक्ष व्लोदीमीर झेलेन्स्की यांनी हा प्रस्ताव स्वीकारला. त्यानंतर आता रशियानेही यावर सहमती दर्शवली आहे. मात्र राष्ट्राध्यक्ष व्लादिमीर पुतीन यांनी काही अटी ठेवल्या आहेत.

रशियाचे अध्यक्ष व्लादिमीर पुतीन यांनी म्हटले की, युक्रेनसोबत 30 दिवसांच्या युद्धविरामाच्या प्रस्तावाशी तत्वत: सहमत आहे. पण काही अटींवर काम करणे आवश्यक असून यामुळे कायस्वरुपी शांतता प्रस्थापित होईल. ते मॉस्को येथे झालेल्या पत्रकार परिषदेमध्ये बोलत होते. तसेच काही मुद्द्यांवर आपल्याला चर्चा करायची आहे, असेही ते यावेळी म्हणाले.