IND Vs ENG 1st Test – इंग्लंडच्या सलामीवीरांनी केली ऐतिहासिक भागी, लीड्समध्ये 76 वर्षांपूर्वीचा विक्रम मोडीत

लीड्समध्ये सुरू असलेल्या पहिल्या कसोटी सामन्यात टीम इंडियाने इंग्लंडला जिंकण्यासाठी 90 षटकांत 350 धावांचे आव्हान दिले आहे. आव्हानाचा पाठलाग करताना इंग्लंडच्या सलामीविरांनी संयमी फलंदाजी करत पहिल्या विकेटसाठी 188 धावांची भागी केली आणि इतिहास रचला. हेंडिग्लेच्या या मैदानावर तब्बल 76 वर्षांनी हा विक्रम प्रस्थापित झाला आहे.

सलामीला आलेल्या झॅक क्रॉली आणि बेन डकेट यांनी इंग्लंडचा पाया पक्का केला आहे. झॅक क्रॉली (65) आणि बेन डकेट (149) या दोघांनी पहिल्या विकेटसाठी 188 धावांची भागी करत 76 वर्षांपूर्वीचा विक्रम मोडीत काढला आहे. हेडिंग्लेच्या या मैदानावर कसोटी सामन्याच्या चौथ्या डावात सलामीला आलेल्या फलंदाजांनी 188 धावांची रेकॉर्डब्रेक भागी केली आहे. यापूर्वी 1949 साली न्यूझीलंडच्या वर्दुन स्कॉट आणि बर्ट सुटक्लिफ यांनी चौथ्या डावात पहिल्या विकेटसाठी 112 धावांची भागी याच मैदानावर केली होती. त्यानंतर हा विक्रम कोणालाही मोडता आला नव्हता. परंतु आता झॅक क्रॉली आणि बेन डकेट यांनी हा विक्रम आपल्या नावावर केला आहे. त्याचबरोबर घरच्या मैदानावर खेळताना सर्वाधिक धावांची भागी करण्याचा विक्रम सुद्धा झॅक क्रॉली आणि बेन डकेट यांनी आपल्या नावावर केला आहे. 24 वर्षांपूर्वी मार्कस ट्रेस्कोथिक आणि मायकेल आथर्टन यांनी 2001 साली पाकिस्तानविरुद्ध ओल्ट ट्रॅफर्ड येथे 146 धावंची विक्रमी भागी केली होती. आता झॅक क्रॉली आणि बेन डकेट यांनी हा सुद्धा विक्रम मोडीत काढला आहे.