मँचेस्टरच्या ओल्ड ट्रॅफर्ड मैदानावर टीम इंडियाच्या लाजिरवाण्या पराभवातून रवींद्र जडेजा बचावला. जडेजाने वॉशिंग्टन सुंदरसोबत मिळून इंग्लिश संघाच्या विजयाच्या आशा धुळीस मिळवल्या. जडेजाने 185 चेंडूंचा सामना केला आणि 107 धावांची नाबाद खेळी केली. सुंदरसोबत मिळून जडेजाने सर्वांना अपेक्षित कामगिरी केली. जडेजाच्या खेळीमुळे टीम इंडिया चौथी कसोटी अनिर्णित ठेवण्यात यशस्वी झाली. या अनिर्णित खेळीची किंमत विजयापेक्षा अनेक पटीने जास्त आहे. जडेजाने मँचेस्टरमध्ये भारतीय संघाचे श्रेय वाचवून इतिहासही रचला.
रविंद्र जडेजा टेस्ट क्रिकेटमध्ये नंबर सहाच्या खाली फलंदाजी करताना SENA देशांमध्ये सर्वाधिक धावा करणारा भारतीय फलंदाज ठरला आहे. जडेजाने ही कामगिरी मँचेस्टर टेस्टच्या दुसऱ्या डावात केली. या डावात त्याने नाबाद 107 धावा करताना 13 चौकार आणि एक षटकार ठोकला.
त्याचबरोबर इंग्लंडमध्ये नंबर सहाच्या खाली फलंदाजी करताना सर्वाधिक 50 प्लस धावा करण्याचा विक्रमही जडेजाच्या नावावर नोंदवला गेला आहे. तो या यादीत संयुक्तरित्या पहिल्या क्रमांकावर पोहोचला आहे. जडेजाने इंग्लंडमध्ये नवव्यांदा 50 हून अधिक धावा करत विख्यात फलंदाज गॅरी सोबर्सच्या विक्रमाची बरोबरी केली आहे.
रविंद्र जडेजा इंग्लंडमध्ये एक हजारहून अधिक धावा आणि 30 पेक्षा जास्त बळी घेणारा केवळ तिसरा खेळाडू ठरला आहे. त्याआधी ही कामगिरी फक्त गॅरी सोबर्स आणि विल्फ्रेड रोड्स यांनीच केली होती. जड्डूनं इंग्लंडच्या भूमीवर आतापर्यंत 34 बळी घेतले आहेत.
पहिल्या डावाच्या आधारावर इंग्लंडकडे 311 धावांची आघाडी होती. त्यामुळे बहुतांश लोकांनी या टेस्टमध्ये भारतीय संघाचा पराभव निश्चित मानला होता. मात्र, भारतीय फलंदाजांनी झुंजायचं ठरवलं. शुभमन गिल आणि केएल राहुल यांची जोडी इंग्लिश गोलंदाजांसमोर ठामपणे उभी राहिली आणि चौथ्या दिवशी त्यांनी डाव सावरला. राहुलने 90 धावा केल्या, तर शुभमन गिलने मालिकेतील आणखी एक शतक झळकावलं.
या दोघांचे बाद झाल्यावर एक क्षण भारतीय चाहत्यांच्या श्वासाचंही थांबल्यासारखं झालं. पण वॉशिंग्टन सुंदर आणि रवींद्र जडेजा यांनी 203 धावांची उत्तम भागीदारी करत इंग्लंडचे सर्व प्रयत्न वाया घालवले.
Comments are closed.