रायपूरमध्ये भारत विरुद्ध दक्षिण आफ्रिका यांच्यात एक हाय स्कोरिंग सामना झाला. प्रथम फलंदाजी करताना टीम इंडियाने दक्षिण आफ्रिकेला 359 धावांचे लक्ष्य दिले. प्रत्युत्तरात, आफ्रिकन संघाने 49.2 षटकांत लक्ष्य गाठले. प्रोटीज संघाने 4 विकेटनी रोमांचक विजय मिळवला. तीन सामन्यांची मालिका आता 1-1 अशी बरोबरीत आहे. दक्षिण आफ्रिकेने 359 धावांचे लक्ष्य गाठून इतिहास रचला. हा दक्षिण आफ्रिकेचा भारताविरुद्ध एकदिवसीय क्रिकेटमध्ये सर्वाधिक धावांचा पाठलाग आहे. त्यांच्या एकदिवसीय इतिहासातील तिसरा सर्वात यशस्वी धावांचा पाठलाग आहे.
दक्षिण आफ्रिकेने नाणेफेक जिंकून प्रथम गोलंदाजी करण्याचा निर्णय घेतला. भारताकडून रोहित शर्मा आणि यशस्वी जयस्वाल स्वस्तात बाद झाले, परंतु कोहली आणि ऋतुराज यांनी तिसऱ्या विकेटसाठी 195 धावांची भागीदारी करून भारताला मदत केली. यादरम्यान, ऋतुराजने त्याचे पहिले एकदिवसीय शतक झळकावले आणि तो 105 धावांवर बाद झाला. त्यानंतर कोहलीने त्याचे 53वे एकदिवसीय शतक झळकावले. या सामन्यात विराट कोहलीने 102 धावा केल्या. त्यानंतर केएल राहुल आणि जडेजा यांनी शेवटच्या षटकांमध्ये जोरदार फलंदाजी करत भारताला 350 धावांच्या पुढे नेले. राहुल 66 धावांवर नाबाद राहिला. दक्षिण आफ्रिकेकडून मार्को जानसेनने दोन बळी घेतले, तर नांद्रे बर्गर आणि लुंगी न्गीडी यांनी प्रत्येकी एक बळी घेतला.
लक्ष्याचा पाठलाग करणाऱ्या आफ्रिकन संघाची सुरुवात खराब झाली. 26 धावांच्या स्कोअरवर क्विंटन डी कॉक 11 चेंडूत 8 धावांवर बाद झाला. त्यानंतर टेम्बा बावुमा आणि एडेन मार्कराम यांनी 101 धावांची भागीदारी केली. या सामन्यात बावुमा अर्धशतक हुकला, त्याने 48 चेंडूत 46 धावा केल्या. मात्र सलामीवीर एडेन मार्करामने शतक झळकावले. तो 98 चेंडूत 110 धावा करून बाद झाला. त्यानंतर मॅथ्यू ब्रिएट्झके आणि डेवाल्ड ब्रेव्हिस यांनी शानदार फलंदाजी केली, ज्यामुळे आफ्रिकन संघाचा धावांचा पाठलाग सोपा झाला. ब्रेव्हिस 54 आणि ब्रिएट्झके 68 धावांवर बाद झाले. अखेर दक्षिण आफ्रिकेसाठी कॉर्बिन बॉशने उर्वरित काम केले. बॉश 15 चेंडूत 26 धावा करून नाबाद राहिला.
Comments are closed.