भारत आणि वेस्ट इंडिज यांच्यात सुरू असलेल्या दोन सामन्यांच्या कसोटी मालिकेत टीम इंडियाने आपले वर्चस्व अजून बळकट केले आहे. पहिल्या कसोटीत विजय मिळवल्यानंतर दुसऱ्या कसोटीतही भारतीय संघाने दमदार सुरुवात केली. या सामन्यात युवा फलंदाज साई सुदर्शनने आपली सर्वोत्तम कसोटी खेळी साकारत करिअरला नवसंजीवनी दिली. दिल्लीच्या मैदानावर होत असलेल्या या सामन्यात त्याने 165 चेंडूंमध्ये 87 धावा करत 12 चौकार झळकावले आणि सर्व टीकाकारांना सडेतोड उत्तर दिले. शतक केवळ 13 धावांनी हुकले असले, तरी त्याची ही खेळी भारतीय संघासाठी आणि त्याच्या वैयक्तिक करिअरसाठी अत्यंत महत्त्वाची आहे.
सामन्याची सुरुवात भारतासाठी सकारात्मक होती. नाणेफेक जिंकून प्रथम फलंदाजी करताना केएल राहुल आणि यशस्वी जयस्वाल यांनी डावाची सकस सुरुवात केली. केएल राहुल 38 धावांवर बाद झाल्यानंतर साई सुदर्शन फलंदाजीस उतरला. सुरुवातीचा खेळ थोडासा सावध वाटत असला, तरी त्याने लवकरच फॉर्म गाठला आणि यशस्वीसोबत दुसऱ्या विकेटसाठी तब्बल 193 धावांची भागीदारी रचली. दोघांनी मिळून वेस्ट इंडिजच्या गोलंदाजांवर ताण आणत त्यांची रणनीती उध्वस्त केली.
साई सुदर्शनची ही खेळी त्याच्या पूर्वीच्या कामगिरीच्या पार्श्वभूमीवर अधिकच महत्त्वाची ठरते. इंग्लंड दौऱ्यावर आणि अहमदाबादच्या अनुकूल खेळपट्टीवर अपयशी ठरल्यानंतर त्याच्यावर टीका सुरू झाली होती. त्याच्या निवडीवर प्रश्नचिन्ह उपस्थित करण्यात आले होते. मात्र प्रशिक्षक गौतम गंभीर आणि कर्णधार शुभमन गिल यांनी त्याच्यावर विश्वास कायम ठेवत पुन्हा एकदा संधी दिली. त्या संधीचे सोनं करत साईने केवळ धावा केल्या नाहीत, तर एका जबाबदार फलंदाजाची भूमिका पार पाडत संघातील स्थान भक्कम केले.
Comments are closed.