भारत-ब्राझीलमध्ये अनेक करार

वृत्तसंस्था/ नवी दिल्ली

पंतप्रधान नरेंद्र मोदी यांनी शनिवारी नवी दिल्लीतील हैदराबाद हाऊस येथे ब्राझीलचे अध्यक्ष लुईझ इनासियो लुला दा सिल्वा यांच्याशी महत्त्वपूर्ण चर्चा करत विविध द्विपक्षीय करारांवर स्वाक्षरी केली. मोदी-लुला यांच्या चर्चेचा उद्देश व्यवसाय, ऊर्जा, संरक्षण, शेती, हवामान बदल, तंत्रज्ञान, एआय, महत्त्वपूर्ण खनिजे, सेमीकंडक्टर आणि जागतिक दक्षिणेशी सहकार्य यासारख्या क्षेत्रांसह भारत-ब्राझील धोरणात्मक भागीदारी अधिक मजबूत करणे हा होता. तसेच दहशतवादाविरुद्धच्या लढाईत भारत-ब्राझील यांनी एकत्र येत संयुक्तपणे लढा देण्याचा निर्धारही केला.

पंतप्रधान मोदी आणि लुला या दोन्ही नेत्यांनी बहुध्रुवीय आणि समावेशक जागतिक व्यवस्थेच्या दृष्टिकोनाला पाठिंबा व्यक्त केला. याव्यतिरिक्त त्यांनी संयुक्त राष्ट्रांमध्ये विशेषत: सुरक्षा परिषदेत त्वरित सुधारणा करण्याची मागणी केली. भारत आणि ब्राझीलने दहशतवादाविरुद्धच्या लढाईला बळकटी देण्याची वचनबद्धताही व्यक्त केली. या बैठकीत महत्त्वाची दुर्मिळ खनिजे, डिजिटल सहकार्य, आरोग्य, जनसंपर्क आणि एमएसएमई यासारख्या महत्त्वाच्या क्षेत्रांमध्ये एकूण 10 करारांना अंतिम स्वरूप देण्यात आले. तसेच कृषी, ऊर्जा, खनिजे, औषधनिर्माण, तंत्रज्ञान आणि उत्पादन ही क्षेत्रे एकमेकांच्या सहकार्याद्वारे व्यापार वेगाने वाढवण्यासाठी निर्धारित करण्यात आली. यावेळी पंतप्रधान मोदींनी ब्राझील हा दक्षिण अमेरिकेतील भारताचा सर्वात मोठा व्यापारी भागीदार असल्याचे नमूद केले. दोन्ही देशांनी पुढील पाच वर्षांत त्यांचा द्विपक्षीय व्यापार 20 अब्ज डॉलर्सपेक्षा जास्त करण्याचे लक्ष्य ठेवले आहे. द्विपक्षीय करारांना मूर्त स्वरुप दिल्यानंतर दोन्ही नेत्यांनी संयुक्तपणे करारांसंबंधीची माहिती जारी केली.

तंत्रज्ञान, संरक्षण क्षेत्रात सहकार्य

भारत आणि ब्राझील ब्राझीलमध्ये डिजिटल सार्वजनिक पायाभूत सुविधांसाठी उत्कृष्टता केंद्र स्थापन करण्यासाठी एकत्र काम करत आहेत. दुर्मिळ खनिजांवरील करारामुळे पुरवठा साखळी मजबूत होईल असे पंतप्रधान मोदी यांनी सांगितले. संरक्षण क्षेत्रातील वाढत्या भागीदारीचे वर्णन त्यांनी धोरणात्मक समन्वयाचे उत्कृष्ट उदाहरण म्हणून केले. पंतप्रधान मोदींनी यावेळी जेव्हा भारत आणि ब्राझील एकत्र काम करतात तेव्हा जागतिक दक्षिणेचा आवाज अधिक मजबूत होतो, असे विशेषत्त्वाने नमूद केले.

सहाव्यांदा भारत भेटीचा आनंद : लुला

संयुक्त पत्रकार परिषदेला संबोधित करताना ब्राझीलचे अध्यक्ष लुईझ इनासियो लुला दा सिल्वा यांनी दोन्ही देशांची यशोगाधा सांगितली. ‘माझे प्रिय मित्र, पंतप्रधान मोदी यांच्या आमंत्रणावरून सहाव्यांदा या देशात परतण्याचा आनंद आहे. भारत आणि ब्राझीलमधील बैठक ही नेहमीच ऐतिहासिक ठरत असते. आपण केवळ जागतिक दक्षिणेतील दोन सर्वात मोठ्या लोकशाही नसून ही डिजिटल महासत्ता आणि अक्षय ऊर्जा महासत्ता यांच्यातील बैठक आहे. भारत आणि ब्राझील हे खूप वेगळे देश असून सांस्कृतिक उद्योगांचे केंद्र आहेत. दोन्ही देश बहुपक्षीयता आणि शांततेचे समर्थन करतात, असे लुला यांनी सांगितले.

ऊर्जा सहकार्य हा मजबूत आधारस्तंभ : मोदी

हैदराबाद हाऊस येथे झालेल्या संयुक्त पत्रकार परिषदेत पंतप्रधान मोदी म्हणाले, ऊर्जा सहकार्य हा आपल्या संबंधांचा एक मजबूत आधारस्तंभ आहे. हायड्रोकार्बनसह, आम्ही अक्षय ऊर्जा, इथेनॉल मिश्रण आणि शाश्वत विमान इंधन अशा अनेक क्षेत्रांमध्ये सहकार्य वाढवत आहोत. जागतिक जैवइंधन आघाडीमध्ये ब्राझीलचा सक्रिय सहभाग आमची सामायिक वचनबद्धता दर्शवितो. ब्राझीलने आपत्ती प्रतिरोधक पायाभूत सुविधांसाठीच्या गठबंधनाचे सह-अध्यक्षपद करण्याची ऑफर देखील दिली आहे. या उपक्रमाबद्दल मी अध्यक्ष लुला यांचे अभिनंदन करतो. या क्षेत्रातील ब्राझीलचा प्रचंड अनुभव सीडीआरआयला अधिक मजबूत करण्यात खूप मदत करेल, असा आशावाद व्यक्त केला.

ब्राझील लॅटिन अमेरिकेतील सर्वात मोठा व्यापारी भागीदार!

ब्राझील हा लॅटिन अमेरिकेतील भारताचा सर्वात मोठा व्यापारी भागीदार आहे. पुढील पाच वर्षांत द्विपक्षीय व्यापार 20 अब्ज डॉलर्सच्या पुढे नेण्यासाठी आम्ही वचनबद्ध आहोत. आमचा व्यापार केवळ एक आकडा नाही; तो विश्वासाचे प्रतिबिंब आहे, असे पंतप्रधान मोदी म्हणाले. तंत्रज्ञान आणि नवोन्मेषातील आमचे सहकार्य दोन्ही देशांसाठी तसेच संपूर्ण जागतिक दक्षिणेसाठी महत्त्वाचे आहे. ब्राझीलमध्ये डिजिटल सार्वजनिक पायाभूत सुविधांसाठी उत्कृष्टता केंद्र तयार करण्यावर आम्ही काम करत आहोत याचा मला आनंद आहे. आम्ही कृत्रिम बुद्धिमत्ता, सुपरकॉम्प्युटर, सेमीकंडक्टर आणि ब्लॉकचेनसाठी केंद्रे विकसित करण्यावर काम करू, असेही ते पुढे म्हणाले.

लूला यांच्यासह शिष्टमंडळाचे मानले आभार

राष्ट्रपती लूला आणि त्यांच्या शिष्टमंडळाचे भारतात स्वागत करताना मला आनंद होत आहे. गेल्या वर्षी तुम्ही ब्राझीलमध्ये माझे स्वागत केले त्याचप्रमाणे मी तुम्हा सर्वांना शुभेच्छा देतो. अध्यक्ष लूला यांच्या दूरदृष्टी आणि प्रेरणादायी नेतृत्वामुळे भारत आणि ब्राझीलमधील संबंधांना बराच काळ फायदा झाला आहे. गेल्या काही वर्षांत आम्हा दोघांना अनेक वेळा भेटण्याचा बहुमान मिळाला आहे. तुमच्या भेटीमुळे या ऐतिहासिक एआय शिखर परिषदेचे महत्त्व वाढले आणि आमच्या धोरणात्मक भागीदारीलाही ऊर्जा मिळाली. आमच्या दोन्ही देशांमधील संबंधांबद्दलच्या तुमच्या वचनबद्धतेबद्दल मी कृतज्ञता व्यक्त करतो, असे पंतप्रधान नरेंद्र मोदी म्हणाले.