IPL 2026: बंगळूरु पोलिसांकडून ट्रॅफिक ॲडव्हायझरी जारी! जाणून घ्या पार्किंगपासून एन्ट्री-एक्झिटपर्यंत सर्व माहिती

आयपीएल 2026 चा पहिला सामना 28 मार्च, शनिवारी रॉयल चॅलेंजर्स बंगळुरू (RCB) आणि सनरायझर्स हैदराबाद (SRH) यांच्यात बेंगळुरूच्या एम. चिन्नास्वामी स्टेडियमवर खेळला जाईल. त्यानंतर 5 एप्रिल रोजी याच मैदानावर आरसीबी आणि चेन्नई सुपर किंग्स यांच्यात लढत होईल. या दोन्ही सामन्यांसाठी बेंगळुरू ट्रॅफिक पोलिसांनी विशेष नियमावली (Advisory) जारी केली आहे. आयपीएलच्या पहिल्या टप्प्याचे वेळापत्रक जाहीर झाल्यानंतर काही दिवसांनी बेंगळुरूमध्ये हे सामने होणार असल्याचे निश्चित झाले.

गेल्या हंगामात (IPL 2025) आरसीबीने ट्रॉफी जिंकल्यानंतर काढलेल्या ‘व्हिक्ट्री परेड’ दरम्यान स्टेडियमबाहेर झालेल्या चेंगराचेंगरीत 11 जणांना आपला जीव गमवावा लागला होता, तर अनेक जण जखमी झाले होते. ही घटना लक्षात घेता, स्टेडियममध्ये होणाऱ्या सामन्यांसाठी यंदा कडक सुरक्षा व्यवस्था तैनात करण्यात आली आहे.

गर्दीवर नियंत्रण मिळवण्यासाठी स्टेडियमच्या आसपासच्या परिसरात पार्किंगला परवानगी नाकारण्यात आली आहे. यामध्ये बालेकुंद्री सर्कल आणि सीटीओ जंक्शन दरम्यानचा क्वीन्स रोड, अनिल कुंबले सर्कल ते क्वीन्स सर्कलपर्यंतचा एमजी रोड आणि एमजी रोडला कब्बन रोडशी जोडणारा लिंक रोड यांचा समावेश आहे. याशिवाय कब्बन रोड, सेंट मार्क रोड, म्युझियम रोड, कस्तुरबा रोड, सेंट्रल स्ट्रीट, लावेल रोड आणि विट्टल माल्या रोडवरही पार्किंगला बंदी असेल. कब्बन पार्कच्या आतील रस्ते जसे की किंग रोड, प्रेस क्लब एरिया आणि फाऊंटन रोड हे देखील ‘नो पार्किंग’ झोनमध्ये असतील. या भागात पार्क केलेल्या गाड्यांवर दंड आकारला जाईल किंवा गाड्या टो करून नेल्या जातील, असे अधिकाऱ्यांनी स्पष्ट केले आहे.

"वाहतूक सल्ला ” pic.twitter.com/i24ICqYhQT

— बेंगळुरू ट्रॅफिक पोलिस बेंगलुरु ट्रॅफिक पोलिस (@blrcitytraffic) 26 मार्च 2026

सामन्याच्या दिवशी गाड्यांच्या पार्किंगसाठी पोलिसांनी खास व्यवस्था केली आहे. गर्दी कमी करण्यासाठी सिद्दालिंगैया सर्कल येथील सेंट जोसेफ इंडियन हायस्कूल ग्राउंड आणि म्युझियम रोडवरील सेंट जोसेफ युरोपियन स्कूल ग्राउंड येथे पार्किंगची सोय करण्यात आली आहे. याव्यतिरिक्त, फ्रीडम पार्क एमएलसीपी, गरुडा मॉल, युबी सिटी आणि शिवाजीनगर टीटीएमसीच्या पहिल्या मजल्यावर पार्किंगचे पर्याय उपलब्ध आहेत. स्टेडियमजवळील वाहतुकीचा ताण कमी करण्यासाठी प्रेक्षकांनी या सुविधांचा वापर करावा, असे आवाहन अधिकाऱ्यांनी केले आहे.

गर्दीच्या हालचालीसाठी अनेक एन्ट्री आणि एक्झिट गेट्स बनवण्यात आले आहेत. कब्बन रोडच्या बाजूने गेट E-1 ते E-3, E-18, E-19, E-22, E-23, लिंक रोडच्या बाजूने E-11 ते E-17 आणि क्वीन्स रोडवरील E-05 आणि E-08 मधून प्रवेशाची परवानगी असेल. बाहेर पडण्यासाठी E-09 आणि E-9A या गेट्सचा वापर केला जाईल. गेट E-10 हे खेळाडू, अधिकारी आणि व्हीआयपी लोकांसाठी राखीव असेल. कॅब आणि ऑटो वापरणाऱ्यांसाठी पिकअप पॉईंट ‘बीआरव्ही ग्राउंड’ आणि ‘मानेकशॉ परेड ग्राउंड’ येथे असेल, तर ड्रॉप पॉईंट गेट नंबर 6 आणि 3 जवळ असेल. पोलिसांनी नागरिकांना मेट्रो आणि बीएमटीसी बसचा वापर करण्याचे आवाहन केले आहे.