आयपीएलच्या १९ व्या हंगामाला अवघे ११ दिवस उरले असतानाच, दुखापतींच्या संकटामुळे दोन संघांसमोर मोठी डोकेदुखी निर्माण झाली आहे. गतविजेते रॉयल चॅलेंजर्स बंगळुरू (RCB) आणि सनरायझर्स हैदराबाद (SRH) या संघांना अडचणींचा सामना करावा लागत आहे; कारण त्यांचे प्रमुख गोलंदाज पॅट कमिन्स आणि जोश हेझलवूड गेल्या अनेक महिन्यांपासून दुखापतींशी झुंज देत आहेत. या दोन्ही खेळाडूंना आयपीएलमध्ये खेळण्यासाठी क्रिकेट ऑस्ट्रेलियाकडून अद्याप ना-हरकत प्रमाणपत्र (NOC) मिळालेले नाही. परिणामी, हे दोन्ही खेळाडू हंगामातील सुरुवातीच्या काही सामन्यांना मुकण्याची शक्यता आहे.
जोश हेझलवूड हा आरसीबीसाठी सामना जिंकवून देणारा एक अत्यंत महत्त्वाचा गोलंदाज आहे. मागील हंगामात त्याने संघासाठी २२ विकेट्स मिळवले होते. मात्र, वृत्तानुसार, जोश १९ व्या हंगामातील पहिले दोन सामने खेळू शकणार नाही अशी शक्यता वर्तवली जात आहे. याचाच अर्थ असा की, सनरायझर्स हैदराबाद आणि चेन्नई सुपर किंग्ज यांच्याविरुद्धच्या सामन्यांमध्ये तो खेळताना दिसणार नाही. या रिक्त जागेच्या पार्श्वभूमीवर, न्यूझीलंडचा वेगवान गोलंदाज जेकब डफी ज्याने विश्वचषकाच्या अंतिम सामन्यात सहभाग घेतला होता. त्याला संघात स्थान भरून काढण्याची संधी दिली जाण्याची चर्चा सुरू आहे.
जेकब डफी हा सध्या टी20 आंतरराष्ट्रीय क्रिकेटमध्ये न्यूझीलंडचा अव्वल क्रमांकाचा गोलंदाज आहे. नुकत्याच पार पडलेल्या विश्वचषकाच्या अंतिम सामन्यात तो भारतीय संघाविरुद्ध खेळला होता. आपल्या कारकिर्दीत, त्याने ४८ सामन्यांमध्ये ६२ बळी मिळवले आहेत. डेथ ओव्हर्समध्ये जिद्दीने गोलंदाजी करण्यात आणि पॉवरप्लेमध्ये अचूक व काटक गोलंदाजी करण्यात जेकब माहीर आहे. त्याचा गोलंदाजीचा वेग आणि प्रभावी बाउन्सर्स टाकण्याची त्याची क्षमता पाहता, जोशमुळे निर्माण झालेली पोकळी भरून काढण्यासाठी त्याला खरोखरच संधी दिली जाते की नाही, हे पाहणे औत्सुक्याचे ठरेल.
Comments are closed.