IPL 2026 ला जेव्हा सुरुवात होईल, तेव्हा सर्वांच्या नजरा मुंबई इंडियन्सवर खिळलेल्या असतील. पाच वेळा चॅम्पियन राहिलेला मुंबईचा संघ 2020 नंतर एकदाही फायनलमध्ये पोहोचलेला नाही. IPL 2025 मध्ये मुंबईने दुसऱ्या क्वालिफायरपर्यंत मजल मारली होती, पण पंजाब किंग्सविरुद्ध 5 विकेट्सने पराभव झाल्यामुळे त्यांना बाहेर पडावे लागले. आता प्रश्न असा आहे की, गेल्या 5 सीझनपासून चालत आलेला विजेतेपदाचा दुष्काळ संपवण्यासाठी मुंबई यावेळी कोणत्या प्लेइंग इलेव्हनसह मैदानात उतरेल.
रोहित शर्मा मुंबई इंडियन्सचा सर्वात महत्त्वाचा खेळाडू असेल, ज्याच्यावर सलामीची (Opening) जबाबदारी असेल. क्विंटन डी कॉक 5 वर्षांनंतर मुंबई इंडियन्समध्ये परतत आहे, जो रोहितसोबत डावाची सुरुवात करू शकतो. जर हे दोन्ही खेळाडू चांगल्या फॉर्ममध्ये राहिले, तर गोलंदाजांना त्यांना रोखण्यासाठी मोठी कसरत करावी लागेल. तिलक वर्मा आणि सूर्यकुमार यादव यांना भारतीय संघात मिळते तशीच फलंदाजीची क्रमवारी मिळू शकते. मात्र, टी-20 वर्ल्ड कपच्या शेवटच्या सामन्यांमध्ये तिलकला लोअर मिडल ऑर्डरमध्ये पाठवण्यात आले होते.
मिडल ऑर्डरमध्ये विल जॅक्स सध्या जबरदस्त फॉर्ममध्ये आहे, जो वर्ल्ड कपमध्ये 176.5 च्या तुफानी स्ट्राइक रेटने 226 धावा करून येत आहे. त्यानंतर कर्णधार हार्दिक पांड्या आणि स्पिन बॉलिंग ऑलराउंडर नमन धीर यांना संधी मिळू शकते. नमन धीरला मुंबईने 5.25 कोटी रुपयांमध्ये रिटेन केले होते. त्यांच्या पाठोपाठ मिचेल सँटनर फलंदाजीला येऊ शकतो, याचा अर्थ मुंबईकडे नंबर 8 पर्यंत नियमित फलंदाजीचे पर्याय उपलब्ध असतील.
विल जॅक्स, मिचेल सँटनर आणि नमन धीर हे तीन स्पिन गोलंदाजीचे पर्याय असतील. तर वेगवान गोलंदाजीची धुरा जसप्रीत बुमराह, ट्रेंट बोल्ट आणि दीपक चहर यांच्या खांद्यावर असेल. चौथ्या वेगवान गोलंदाजाचा पर्याय म्हणून स्वतः कर्णधार हार्दिक पांड्या संघात असेल.
Comments are closed.