IPL 2026: कोण जिंकणार ऑरेंज कॅप? आकाश चोप्रांनी वर्तवली दोन नावे; युवा वैभव सूर्यवंशीबद्दल दिला मोठा इशारा!

आयपीएल 2026 चा थरार 28 मार्चपासून सुरू होत आहे. स्पर्धेच्या सुरुवातीपूर्वी भारताचा माजी क्रिकेटपटू आकाश चोप्राने राजस्थान रॉयल्सच्या संघात असलेल्या काही त्रुटींवर बोट ठेवले आहे. सॅम करन जर स्पर्धेतून बाहेर झाला, तर राजस्थानच्या अडचणी वाढू शकतात, असे त्यांनी सांगितले आहे. आकाशने आपल्या ‘X’ (ट्विटर) सोशल मीडिया अकाउंटवर एक व्हिडिओ शेअर केला आहे, ज्यामध्ये तो राजस्थान रॉयल्सच्या संघाचा रिव्ह्यू करताना दिसत आहे. या व्हिडिओत त्याने राजस्थानची ताकद आणि त्यांच्या कमकुवत बाजूंबद्दल भाष्य केले आहे.

​सीझन सुरू होण्यापूर्वीच राजस्थानला मोठा धक्का बसला आहे. ‘ईएसपीएन क्रिकइन्फो’च्या वृत्तानुसार, अष्टपैलू खेळाडू सॅम करन ‘ग्रोइन इंजरी’मुळे (मांडीच्या स्नायू दुखापत) संपूर्ण स्पर्धेतून बाहेर झाला आहे. करन नुकत्याच संपलेल्या टी-20 वर्ल्ड कप 2026 मध्ये उत्कृष्ट लयीत दिसत होता.

​आकाश चोप्राच्या मते, सॅम करनच्या अनुपस्थितीमुळे राजस्थानच्या विजयाच्या संधी कमी होऊ शकतात, कारण संघाला पुन्हा एकदा प्लेइंग इलेव्हनमध्ये नंबर 8 वर एक मजबूत फलंदाज नसल्याच्या समस्येचा सामना करावा लागू शकतो. आकाशने व्हिडिओमध्ये म्हटले आहे की, “सॅम करनच्या अनुपस्थितीने हे आव्हान अधिक मोठे केले आहे. नंबर 8 वर कोण फलंदाजी करणार? ही समस्या त्यांना पुन्हा एकदा सतावणार का? कदाचित त्यांना नांद्रे बर्गरला खेळवावे लागू शकते.”

​तथापि, माजी भारतीय फलंदाजाने संघाच्या फलंदाजी आणि गोलंदाजी युनिटचे कौतुक करताना म्हटले की, त्यांच्याकडे खेळाच्या प्रत्येक टप्प्यासाठी पर्याय उपलब्ध आहेत आणि असे जबरदस्त हिटर्स आहेत जे सुरुवातीपासूनच वर्चस्व गाजवू शकतात. तो म्हणाला, “राजस्थान रॉयल्सच्या फलंदाजीत जबरदस्त प्रहार करण्याची क्षमता आहे. वैभव सूर्यवंशी, यशस्वी जयस्वाल, रियान पराग, ध्रुव जुरेल, शिमरॉन हेटमायर, डॅनियल फरेरा, रवींद्र जडेजा आणि जोफ्रा आर्चर असे खेळाडू त्यांच्याकडे आहेत.”

​राजस्थानच्या गोलंदाजीबद्दल बोलताना आकाश म्हणाला, “वेगवान गोलंदाजी विभागातही तुमच्याकडे असे गोलंदाज आहेत जे वेगवेगळ्या टप्प्यात गोलंदाजी करू शकतात. नवीन चेंडूसह बर्गर आणि जोफ्रा आर्चर सुरुवात करू शकतात. संदीप शर्मा आणि तुषार देशपांडे देखील संघाकडे आहेत. याशिवाय माफाका सारखा एक उत्कृष्ट गोलंदाजही उपलब्ध आहे. फिरकी विभागातही सुधारणा झाली आहे. यावेळी संघाकडे जडेजा आणि रवी बिश्नोईच्या रूपाने दोन प्रभावी फिरकीपटू आहेत.”

​चोप्रा यांच्या मते, हा सीझन नवीन कर्णधार रियान परागसाठी स्वतःला सिद्ध करण्याची मोठी संधी आहे. “कर्णधारासाठी आपले नाव कमावण्याची ही चांगली संधी आहे. ध्रुव जुरेल आणि यशस्वी जयस्वाल ‘ऑरेंज कॅप’ जिंकू शकतात. वैभव सूर्यवंशी देखील चमकू शकतो. फलंदाजीच्या बाबतीत संघाची रणनीती सातत्याने आक्रमक राहण्याची असेल, तर गोलंदाजीमध्ये सुरुवातीच्या षटकांत आणि नंतर मधल्या षटकांत विकेट घेण्यावर भर असेल.” राजस्थान रॉयल्स आयपीएल 2026 मधील आपला पहिला सामना 30 मार्च रोजी गुवाहाटीच्या बरसापारा क्रिकेट स्टेडियमवर चेन्नई सुपर किंग्सविरुद्ध खेळणार आहे.