इराणच्या सामरिकदृष्ट्या महत्त्वाच्या चाबहार बंदरावर अमेरिकेने हल्ला केल्याचा दावा करण्यात आला आहे. अमेरिकेचे युद्ध सचिव पीट हेगसेथ यांनी हल्ल्याचा एक फोटो शेअर केला असून बंदराचा सागरी वाहतूक नियंत्रण टॉवर पूर्णपणे उद्ध्वस्त झाल्याचे सांगितले.
इराणच्या दक्षिण किनारपट्टी भागात अमेरिकन लष्कराने केलेल्या हल्ल्यांमध्ये चाबहार बंदराला लक्ष्य करण्यात आले. या हल्ल्यात शहीद बेहेश्ती आणि कलंतरी घाटांचेही नुकसान झाल्याचे अहवालात म्हटले आहे.
इराणची सरकारी मीडिया IRIB आणि IRNA ने देखील चाबहार बंदरावरील हल्ल्याची पुष्टी केली आहे. त्याचबरोबर चाबहार फ्री झोन ऑर्गनायझेशनचे प्रमुख मोहम्मद सईद अरबाबी यांनीही कंट्रोल टॉवर नष्ट झाल्याची माहिती दिली आहे.
इराणसोबतचा युद्धविराम तोडल्यानंतर ही कारवाई अमेरिकेची पहिली लष्करी कारवाई असल्याचं म्हटलं जात आहे. यूएस सेंट्रल कमांड (CENTCOM) नुसार, हवाई संरक्षण प्रणाली, किनारी पाळत ठेवणारी उपकरणे आणि नौदलाच्या पायाभूत सुविधांसह सुमारे 90 इराणी लष्करी लक्ष्यांना हल्ल्यादरम्यान लक्ष्य करण्यात आले.
चाबहार बंदर हा भारतासाठी अत्यंत महत्त्वाचा धोरणात्मक प्रकल्प आहे. अफगाणिस्तान आणि मध्य आशियामध्ये भारताला सागरी प्रवेश प्रदान करणारा हा प्रमुख मार्ग आहे. या बंदरात भारताकडून मोठी गुंतवणूक होत असून प्रादेशिक व्यापार आणि संपर्काच्या दृष्टीने हे बंदर महत्त्वाचे मानले जाते.
Comments are closed.