iran israel war – लेबनॉनमध्ये इस्रायलचा हवाई हल्ला; तीन मजली इमारत उद्ध्वस्त होऊन मुलांसह 19 जणांचा मृत्यू

दक्षिण लेबनॉनमधील सिरे अल-घरबिया भागावर इस्रायलने केलेल्या हवाई हल्ल्यात एका तीन मजली इमारतीला लक्ष्य करण्यात आले. या हल्ल्यात मुलांसह किमान 19 जणांचा मृत्यू झाल्याची धक्कादायक माहिती समोर आली आहे. अल जझीराने दिलेल्या वृत्तानुसार, हा हल्ला इतका भीषण होता की संपूर्ण इमारत कोसळून ढिगाऱ्यात रूपांतरित झाली आहे.

या घटनेनंतर स्थानिक नागरी संरक्षण दल आणि बचाव पथकांनी तातडीने घटनास्थळी धाव घेतली असून, ढिगाऱ्याखाली अडकलेल्या लोकांना बाहेर काढण्यासाठी युद्धपातळीवर प्रयत्न सुरू आहेत. बचाव पथके सध्या ढिगारा साफ करण्याचे आणि मृतदेह बाहेर काढण्याचे काम करत आहेत. या हल्ल्यामुळे परिसरात भीतीचे वातावरण पसरले असून, जीवितहानीचा आकडा वाढण्याची भीती व्यक्त होत आहे. स्थानिक अधिकारी सध्या या हल्ल्यामुळे झालेल्या एकूण नुकसानीचे आणि परिणामांचे सविस्तर मूल्यमापन करत असून बचावकार्य अद्याप सुरू आहे.