आयटीएफ पुरुष टेनिस स्पर्धा – सिद्धार्थ-फिलीप जेतेपदासाठी भिडणार, दुहेरीत जीवन-रामकुमार जोडीला विजेतेपद

भारताचा सिद्धार्थ रावत व फ्रान्सचा फिलीप सेकुलिक यांनी आपापल्या प्रतिस्पर्धी खेळाडूंचा पराभव करून आयटीएफ पुरुष टेनिस स्पर्धेच्या अंतिम फेरीत प्रवेश केला. दुहेरीत जीवन नेदुसेझियान व रामकुमार रामनाथन या भारतीय जोडीने विजेतेपदाला गवसणी घातली.

एकेरीच्या पहिल्या उपांत्य लढतीत हिंदुस्थानच्या बिगरमानांकित सिद्धार्थ रावतने अव्वल मानांकित फ्रान्सच्या फ्लोरेंट बॅक्सचा टायब्रेकमध्ये ६-२, ६-७ (३), ६-३ असा संघर्षपूर्ण पराभव करून अंतिम फेरी गाठली. हा सामना ३ तास ५ मिनिटे चालला. दुसऱ्या उपांत्य फेरीच्या सामन्यात फ्रान्सच्या पाचव्या मानांकित फिलीप सेकुलिक याने स्वीडनच्या लिओ बोर्गचा ५-७, ६-४, ६-१ असा पराभव करून अंतिम फेरीत धडक मारली.

दुहेरीत अंतिम फेरीत हिंदुस्थानच्या जीवन नेदुसेझियान व रामकुमार रामनाथन या अव्वल मानांकित जोडीने स्वीडनच्या लिओ बोर्ग व युक्रेनच्या युरी इवाकियान यांचा ६-३, ६-४ असा पराभव करून विजेतेपद पटकावले. स्पर्धेतील दुहेरीतील विजेत्या जोडीला करंडक व २५ गुण, तर उपविजेत्या जोडीला करंडक व १४ गुण, अशी पारितोषिके देण्यात आली. स्पर्धेचे पारितोषिक वितरण एमएसएलटीएचे चेअरमन भरत ओझा, एमएसएलटीएचे मुख्य कार्यकारी अधिकारी मनोज वैद्य यांच्या हस्ते करण्यात आले. यावेळी स्पर्धा निरीक्षक सुप्रीत कडवागिरी आदी मान्यवर उपस्थित होते.