विराट-रजत नाही! आरसीबीचा 'लकी चार्म' ठरला हा खेळाडू; आयपीएल 2026 मध्ये खेळलेल्या प्रत्येक सामन्यात मिळाला विजय

आयपीएल 2026 चे विजेतेपद पटकावणाऱ्या रॉयल चॅलेंजर्स बंगळुरु संघात (RCB) एक असा खेळाडू होता, ज्याच्या उपस्थितीमुळे संघाला केवळ एक-दोन नव्हे, तर तब्बल सहा सामन्यांमध्ये विजय मिळवता आला. हा खेळाडू विराट कोहली किंवा रजत पाटीदार नसून, न्यूझीलंडचा वेगवान गोलंदाज जेकब डफी आहे. आयपीएल 2026 मध्ये डफी ज्या-ज्या सामन्यांमध्ये खेळला, त्या प्रत्येक सामन्यात आरसीबीने विजय मिळवला.

या हंगामात जेकब डफीने आरसीबीकडून एकूण सहा सामने खेळले; या सामन्यांमध्ये अंतिम सामन्याचाही समावेश होता. विशेष म्हणजे, आरसीबीने हे सर्वच्या सर्व सहा सामने जिंकले. परिणामी, या हंगामातील आरसीबीचा “सर्वात नशीबवान” खेळाडू म्हणून तो समोर आला आहे.

आयपीएलच्या इतिहासात, एकाच हंगामात किमान पाच सामन्यांमध्ये सहभागी होऊन, प्रत्येक वेळी आपल्या संघाला विजय मिळवून देणारा डफी हा केवळ चौथा खेळाडू ठरला आहे. यापूर्वी, 2008 मध्ये किंग्स XI पंजाबचा ल्युक पोमर्सबॅक (5 सामने) आणि चेन्नई सुपर किंग्सचा पलानी अमरनाथ (6 सामने), तसेच 2009 मध्ये डेक्कन चार्जर्सचा हरमीत सिंग (7 सामने) यांनी अशीच कामगिरी केली होती.

आयपीएल 2026 मधील डफीच्या कामगिरीवर नजर टाकल्यास, त्याने 6 सामन्यांमध्ये 9 विकेट्स घेतले. ज्यामध्ये त्याने 24ची सरासरी राखली, तर त्याचा इकॉनॉमी रेट 10.95 इतका राहिला. जरी त्याने 263 धावा दिल्या असल्या, तरी पॉवरप्ले आणि डेथ ओव्हर्स या दोन्ही महत्त्वाच्या टप्प्यांवर निर्णायक क्षणी मोक्याचे बळी घेऊन त्याने संघाला मोठे यश मिळवून दिले.

अंतिम सामन्यात गुजरात टायटन्सचा पराभव करून आरसीबीने आयपीएल 2026 चे विजेतेपद पटकावले. अहमदाबाद येथे पार पडलेल्या या सामन्यानंतर, जेकब डफीचे संघाचा “लकी चार्म” म्हणून विशेष कौतुक केले जात आहे.