5 वर्षांपूर्वी लग्न; पत्नीच्या चारित्र्यावर संशय, नवऱ्याने लोखंडी रॉडनं वार करून पत्नीला संपवलं

भोकरदन (जि. जालना) : जालना जिल्ह्यातील भोकरदन तालुक्यातील पारध गावात धक्कादायक घटना घडली आहे. कौटुंबिक वादातून पतीने पत्नीची हत्या करून नंतर आत्महत्या केल्याची घटना घडली आहे.समाधान अल्हाट आणि पत्नी कीर्ती अल्हाट यांच्यात दुपारी वाद झाला होता. या वादानंतर समाधान अल्हाट यांनी लोखंडी रॉडने पत्नीच्या डोक्यावर वार करून तिचा खून केला. पत्नीचा मृत्यू झाल्यानंतर समाधान अल्हाट यांनी घरातच गळफास घेऊन आत्महत्या केली. गेल्या काही दिवसांपासून या दोघांमध्ये वाद सुरू होता. पत्नीच्या चारित्र्यावर संशय घेऊन ही घटना घडली असल्याचा प्राथमिक अंदाज पोलिसांनी व्यक्त केला आहे.

मिळालेल्या माहितीनुसार, दुपारच्या सुमारास कौटुंबिक वादातून लोखंडी रॉडने डोक्यात वार करून पत्नीचा खून करणाऱ्या पतीनेही गळफास घेतला. ही घटना काल (शनिवारी) पहाटे पारध बुद्रुक (ता. भोकरदन) येथे घडली. या प्रकरणात पारध पोलिस ठाण्यात गुन्हा दाखल करण्यात आला आहे. माता-पित्याचा मृत्यू झाल्याने दोन चिमुकल्यांच्या डोक्यावरचं मायेचं छत्र हरवलं आहे.

समाधान रंगनाथ आल्हाट (वय ३५) आणि कीर्ती समाधान आल्हाट (वय ३०, दोघे रा. पारध बु) अशी मयतांची नावे आहेत. समाधान व कीर्ती यांचं पाच वर्षांपूर्वी लग्न झालं होतं. त्यांना दोन वर्षांची स्वामिनी नावाची मुलगी व ४ वर्षांचा रुद्र नावाचा मुलगा आहे. गेल्या काही दिवसांपासून या दोघांमझ्ये वारंवार वाद होत होता. यामुळे कीर्ती काही दिवसांपूर्वी माहेरी (वसई, ता. सिल्लोड) गेली होती. समाधान अल्हाट याने त्यांना पाच-सहा दिवसांपूर्वी पारध आणले होते. परंतु, समाधान आल्हाट याने शनिवारी सकाळी कीर्ती यांच्या डोक्यात लोखंडी रॉडने घाव घालत खून केला आणि नंतर स्वतःही राहत्या घरात गळफास घेऊन आत्महत्या केली. घटनेची माहिती मिळताच पारध पोलिसांनी घटनास्थळी जाऊन पंचनामा केला.

मृतदेह घरात पडलेले, मुलं खेळण्यात दंग, आई झोपलेली वाटली

सकाळी उठल्यानंतर मुलांना आई झोपली आहे असं वाटलं. त्यामुळे रूद्र आणि स्वामिनी ही मुलं घराबाहेर पडली आणि खेळू लागली. आजी (आईची आई) मीराबाई मोकसरे या घरी आल्या, त्यांनी मुलांना आई कुठे आहे, असं विचारलं. मुलांनी आई झोपल्याचं सांगितलं. आजी घरात गेल्यानंतर ही घटना समोर आली.

आजीने घरात प्रवेश केला अन् मृतदेह दिसले

मयत कीर्ती यांची आई मीराबाई दिलीप मोकसरे या हेडंबा यात्रेसाठी काल (शनिवारी) दुपारी ३ वाजता पारध बुद्रुक गावात आल्या होत्या. मुलीच्या घरात जाताच मुलगी रक्ताच्या थारोळ्यात पडलेली आणि जावयाने गळफास घेतल्याचं दिसून आलं. त्यानंतर घटनेची
माहिती पोलिसांना देण्यात आली.

आणखी वाचा